Ystervarkiekoek

Maak ’n dubbellaagkoek vir ’n variasie op dié gewilde lekkerny

Deur MARLO KITSHOFF-CARSTENS en SUZANNE CROZIER

1 groot koek

Bestanddele

Koek
200 g botter
250 ml (1 k) strooisuiker
4 ekstragroot eiers
560 ml (2¼ k) koekmeel
15 ml (3 t) bakpoeier
knypie sout
187 ml (¾ k) volroommelk
Sjokoladesous
375 ml (1½ k) water
80 g botter
750 ml (3 k) versiersuiker
60 ml (4 e) kakao
5 ml (1 t) vanieljegeursel
625 ml (2½ k) klapper
Roomkaasvulsel
250 g (1 bakkie) roomkaas
250 ml (1 k) versiersuiker, gesif
200 g (1 plak) donkersjokolade, gesmelt

Metode

Stel oond op 180 °C.

1. Koek Room botter en suiker met elektriese klitser tot lig en donserig.
2. Klits eiers een vir een by en klits goed ná elke byvoeging.
3.  Sif koekmeel, bakpoeier en sout saam.
4. Roer koekmeel en melk beurtelings by bottermengsel tot gladde deeg.
5. Voer twee koekpanne met 22 cmdeursnee met bakpapier uit en spuit met kossproei.
6. Verdeel beslag tussen koekpanne en maak deeg gelyk bo-op.
7. Bak vir 25 minute of tot toetspen skoon uitkom.
8. Laat koeke bietjie in koekpanne afkoel en keer op afkoelrakkie uit om heeltemal af te koel.
9. Sny bokante van koeklae met broodmes gelyk.
10. Sjokoladesous Verhit water, botter, versiersuiker en kakao saam in kastrol oor matige hitte en roer gedurig tot al die bestanddele opgelos en sjokoladesous glad is.
11. Draai stoofplaat se hitte hoër. Prut sjokoladesous vir drie minute vandat dit begin borrels maak. Verwyder van stoofplaat om effens af te koel. Roer vanieljegeursel by.
12. Gooi klapper in vlak bak wat groot genoeg is dat koek daarin kan pas.
13. Gooi sjokoladesous in bak bietjie groter as koek, maar wat hoë rand het.
14. Doop een koeklaag op ’n slag in sjokoladesous en bedek hele koek met sous.
15. Plaas gedoopte koeklaag in klapper en sprinkel van klapper langs kante en booor koek. Plaas op koekstander.
16. Doen dieselfde met oorblywende koeklaag. Hou eenkant terwyl roomkaasvulsel berei word.
17. Roomkaasvulsel Roer roomkaas tot glad terwyl versiersuiker bygevoeg word.
18. Smelt sjokolade vir paar sekondes in mikrogolf op 50% krag. Roer tot sjokolade glad en sonder klonte is.
19. Roer bietjie van roomkaas by gesmelte sjokolade. Verhit indien nodig.
20. Roer sjokolademengsel by roomkaas en roer tot glad.
21. Skep helfte van roomkaasvulsel op een koeklaag.
22. Plaas ander koeklaag bo-op en skep oorblywende roomkaas oor.
23. Sit in skywe voor.