Die sanger Adam Barnard is baie bedrywig, maar vind gelukkig darem nog tyd vir kosmaak en kuier graag in die kombuis. Hy hou daarvan om met koljander en naeltjies te kook en is gek na ’n skaapribbetjie uit die Karoo. Paptert laat hom aan sy kinderdae terugdink. Hy sê mense is geneig om altyd die plaat op maksimum te sit as hulle gewone boerekos kook en daarom is sy kookgeheim … tyd. “Lekker kos vat tyd om te maak en daarvoor kan jy maar die temperatuur laag stel.”

KOSFILOSOFIE

Geniet kosmaak. Moenie dat dit ’n plig word nie.

Hierdie resep is ’n ongewone kombinasie wat in jou mond smelt

 

6 tot 8 porsies

VOLSTRUISFILET

250 ml (1 k) olyfolie

750 ml (3 k) droë rooiwyn

1 kg volstruisfilet

genoeg sout

genoeg peper

genoeg Cajun-speserye

SJOKOLADESOUS

400 g melksjokolade

100 ml room of volroommelk

1 -3 brandrissies (chillies), ontpit en fyngekap

sout en peper na smaak

Cajun-speserye na smaak

1 Filet Gooi olyfolie en rooiwyn in geskikte bak en laat filet vooraf daarin marineer.

2 Meng sout, peper en Cajun-speserye en rol filet daarin.

3 Panbraai filet of braai dit oor kole tot mediumgaar.

4 Sjokoladesous Smelt sjokolade oor lae hitte in dubbelkoker op stoof.

5 Gooi room of melk by om gesmelte sjokolade se tekstuur dunner te maak.

6 Kap brandrissie(s) fyn en voeg by. Verwyder verkieslik pitte van brandrissies of voeg dit by afhangend van hoe warm jy jou sous verkies.

7 Geur sjokoladesous met sout, peper en Cajun-speserye volgens smaak.

8 Laat sjokoladesous bietjie prut tot warm en skep warm oor filet.

WENK

Wees versigtig met brandrissies en Cajun-speserye as jy nie van sulke warm smake hou nie, maar dis ’n wenkombinasie