Steak-en-sampioen-herderspastei

Jy hoef nie vanaand oor aandete kop te krap nie. Maak hierdie steak-en-sampioen-herderspastei

Deur MARLO KITSHOFF-CARSTENS

4 porsies

3 groot aartappels, geskil en in blokke gesny
1 blokkie hoenderaftreksel
250 ml (1 k) cheddarkaas, gerasper
klont botter
knypie neutmuskaat
VLEISVULSEL
60 ml (4 e) koekmeel
knypie sout
knypie swartpeper
800 g steak, in blokkies gesny
olie
2 uie, gekap
5 ml (1 t) vars knoffel, gekap
1 selderystingel, fyngekap
2,5 ml (½ t) droë tiemie
2,5 ml (½ t) droë pietersielie
250 g (1 pakkie) sampioene, in kwarte gesny
15 ml (1 e) Bisto
375 ml (1½ k) kookwater
30 ml (2 e) blatjang
knypie sout en peper

LEES OOK: Hamquiche met aartappelkors

Stel oond op 180 °C.

1. Kook aartappels saam met hoenderaftrekselblokkie. Aartappels moet sag wees, ongeveer 15 minute.
2. Dreineer en maak aartappels met vurk fyn. Roer cheddarkaas, botter en neutmuskaat by. Hou eenkant.
3. Vleisvulsel Skep koekmeel, sout en peper in plastieksakkie. Gooi vleisblokkies daarby in. Knoop sakkie toe en skud tot vleisblokkies met koekmeel bedek is.
4. Verhit bietjie olie en braai vleisblokkies in sarsies tot bruinerig.
5. Verhit nog olie indien nodig. Soteer uie, knoffel, seldery, tiemie en pietersielie tot uie sag is. Voeg sampioene by en soteer tot sag. Skep gebraaide vleisblokkies terug in kastrol.
6. Meng Bisto, water en blatjang tot glad en sonder klonte. Voeg sout en peper by. Voeg by vleisblokkies in kastrol.
7. Plaas kastrol se deksel op en prut vir 25 minute oor lae hitte.
8. Skep fyn aartappels bo-op en maak gelyk met vurk.
9. Bak vir 15 minute en plaas dan onder oond se roosterelement tot goudbruin bo-op.