Sjokoladetowerkoek

Hierdie sjokoladetowerkoek word met ’n slap deeg gemaak en wanneer jy dit bak, skei dit in drie delikate lae

1 koek

Bestanddele

4 eiers, geskei
180 ml (170 g) strooisuiker
5 ml (1 t) vanieljegeursel
120 ml (115 g) botter, gesmelt
180 ml (95 g) koekmeel
60 ml (30 g) kakao
500 ml (2 k) louwarm melk
versiersuiker om bo-oor te sif

Metode

Voorverhit oond tot 160 °C.
Smeer ’n 20 cm-koekpan met botter en waspapier en bestrooi dit met kakao.

1. Klits eierwitte styf.
2. Klits eiergele, suiker en vanieljegeursel tot lig en donsig.
3. Gooi gesmelte botter by en klits vir twee minute. Sif koekmeel en kakao by en klits goed.
4. Gooi louwarm melk by beslag en klits.
5. Vou eierwitte by mengsel in.
6. Gooi beslag in pan.
7. Bak vir 60 minute tot gaar.
8. Laat koek vir drie uur in pan afkoel.
9. Bedien met gesifte versiersuiker booor.

Wenk

Vir ’n vanieljekoek, los net die kakao uit die resep