Sjokoladerolkoek

Bak ’n veerligte sjokoladerolkoek
waaroor almal mal sal wees

Deur MARLO KITSHOFF-CARSTENS

Sjokoladerolkoek

12 porsies

Bestanddele

ROLKOEK
187 ml (¾ k) koekmeel
45 ml (3 e) kakao
7,5 ml (1½ t) bakpoeier
knypie sout
4 ekstragroot eiers
15 ml (1 e) water
187 ml (¾ k) strooisuiker
VERSIERSUIKER
100 g (1/5 blok) sagte botter
60 ml (4 e) kakao, gesif
875 ml (3½ k) versiersuiker, gesif
1 ml bakpoeier
75 ml (5 t) volroommelk
5 ml (1 t) vanieljegeursel

Stel oond op 200 °C

LEES OOK: Maak hierdie lekker kondensmelk-en-sjokolade-rol

 Metode

1. Rolkoek Sif koekmeel, kakao, bakpoeier en sout saam.
2. Klits eiers en water tot liggeel.
3. Klits strooisuiker bietjies op ’n slag by tot goed opgelos.
4. Roer gesifte meelmengsel by eiermengsel.
5. Skep beslag op bakplaat van ongeveer 38 cm x 23 cm wat met bakpapier uitgevoer is.
6. Bak vir 15–18 minute.
7. Keer rolkoek op nuwe stuk bakpapier met gesprinkelde strooisuiker uit.
8. Trek gebruikte bakpapier af en sny kante van rolkoek af sodat dit maklik kan oprol.
9. Rol rolkoek saam met bakpapier op. Hou eenkant om af te koel.
10. Versiersuiker Room botter tot liggeel met elektriese klitser vir ongeveer drie minute.
11. Sif kakao, versiersuiker en bakpoeier saam. Voeg helfte van versiersuikermengsel en melk by bottermengsel. Klits vir ongeveer vyf minute tot donserig.
12. Voeg oorblywende versiersuikermengsel bietjies op ’n slag by terwyl jy aanhoudend klits totdat dit pofferig is.
13. Voeg vanieljegeursel by en klits deur tot goed gemeng.
14. Rol rolkoek oop. Smeer versiersuiker oor rolkoek en rol dan weer met behulp van bakpapier op. Dié keer moet bakpapier nie in binnekant van rolkoek wees nie.
15. Rond af soos verkies en sny in skywe.