Carolize Coetzee is die nuwe hoofsjef by Simonsig wynlandgoed buite Stellenbosch se restaurant, Cuvee.
Maryke Roberts
Sedert sy in 2010 aan die The Hurst Campus (voorheen TCA) kwalifiseer het, het sy ook as Senior Chef de Partie/Larder by Equus Restaurant by Cavalli wyn- en perdeplaas, fyngebak sjef en junior sous chef by Haute Cabriere, Chef de Partie by Makaron @ Majeka House en as junior sjef by Delaire Graff Restaurant gewerk.
Sy vertel dat sy al in hoërskool geweet het, dat sjef word, is wat sy wil doen wanneer sy ‘groot’ is. Haar ouma was altyd in die kombuis en sy vermoed dit is waar haar passie vir kos begin het. Sy het die lekkerste vetkoek gemaak en altyd vir die kleinkinders koekies en vrugtekoek gebak. Sy het nog op 86 steeds koekies gebak.
Wat is die uitdagings om in ‘n nuwe kombuis te begin?
Om die mense te leer ken. Sjefs spandeer meer tyd saam by die werk as by hulle eie families. Mens wil oor die weg kom met almal en ook terselfdertyd jou eie stempel afdruk.
Wat is vir jou belangrik by die bediening van kos?
Ordentlike breekware, eetgerei en blomme op die tafel, skep ‘n gemaklike atmosfeer. Goeie geselskap is ook altyd ‘n bonus!
Wat is die grootste uitdaging om die kos die wyne van Simonsig te laat komplementeer?
Ek wou baie graag ‘n rooi wyn saam met ‘n nagereg bedien, wat gewoonlik moeilik is as gevolg van die tanniene in die wyn, maar die Simonsig SMV het perfek gewerk by ‘n donker sjokolade fondant met vars bessies.
Wat is jou terugval dis as jy vinnig iets moet kook?
Enige vis-dis. Ek kook baie gemaklik met vis en sal vinnig aan iets kan dink.
Watter krui of spesery gebruik jy die graagste in jou kos en watter krui dink jy kry nie genoeg aandag in Suid-Afrikaners se kombuise nie?
Ek is mal oor tiemie. Almal gebruik altyd roosmaryn, maar tiemie is vir my bietjie meer subtiel en kan saam met vis lam of hoender goed werk.
Wat is trooskos vir jou en hoekom?
Gebraaide malva lekkers; dit laat dink my aan my kinderdae met al ses sussies om die vuur.
Watter een bestanddeel kikker vir jou enige maal op?
Suurlemoen
Is daar een dis wat jou vriende, broer, ma, suster, maak waaroor jy mal is en waarvoor jy gereeld vra as jy nie lus is vir kook nie?
My ma se pampoenkoekies!
Wat was jou grootste kombuisflater?
Ek het op my tweede dag as student ‘n hele plaat dennepitte verbrand; dit is vrek duur en die sjef was baie ontsteld! Die res van my blonde oomblikke sal ek liewer vir myself hou!)
Watter kortpad het jy ontdek wat jy met lesers kan deel?
Wanneer jy brood bak in die winter, maak die bak met die deeg in, mooi toe met plastiekfilm, en laat dit rys in ‘n groter bak met warm water.
Hoe voel jy oor botter en eendvet?
Ek gebruik baie botter in nageregte. Veral wanneer ek koeke bak en versier. Eendvet is n wonderlike bestandeel wanneer dit reg geruik word. Daar is niks lekkerder as ‘n krakerige confit eend nie.
As jy nie ‘n sjef was nie, watter ander beroep sou jy kon volg?
Fisioterapie
Watter vyf bestanddele is altyd in jou spens?
Kaneel, bruin suiker, broodmeel, heuning en sout.
Wat is die grootste foute wat mense maak as hulle tuis gaste onthaal?
Ek dink mens wil te gekompliseerde kos maak om mense te beïndruk; eenvoudig is altyd beter. Geure is belangriker as voorkoms, wanneer mens by die huis onthaal.
Wat is jou lewensleuse?
Family is not just an important thing, it is everything.
Na watter sjefs kyk jy op en na wie sal jy gaan vir raad?
Ek kyk op na sjefs wat anders is as al die ander. Wat nie die trend volg nie. Ek het baie geleer by sjef Christiaan Campbell. Hy was die eerste sjef onder wie ek gewerk het en het nou nog kontak met hom.
Wat is jou gunsteling kookboek?
“Strandveldkos” deur Kobus van der Merwe.
Carolize se resep vir veerligte Crème Brulee:
Bestanddele
1 kannetjie room
100 gr strooisuiker
10 eiergele
2 dubbel espressos
Metode
Verhit die room tot net onder kookpunt om ‘n karamelgeur te kry. Room die suiker en eier saam en voeg dan die warm roommengsel by, terwyl jy roer.
Laat die mengsel afkoel. Laat die espresso met die helfte wegkook en voeg dan by die brulee-mengsel. Bak teen 105 ºC vir 25 minute. Bedien met beskuitjies en vars blomme as garnering.
SOURCES
verskaf
