Proe die Klein Karoo deur Beate Joubert het pas by Struik Lifestyle verskyn. Beate was een van die deelnemers aan Kokkedoor 2, kykNET se realiteit-kookprogram en is ook die eienaar van haar eie deli, Alfresco Deli op hul familieplaas, Joubert-Tradauw naby Barrydale in die Klein Karoo.
Maryke Roberts
Hier bedien sy tradisionele Karoodisse met ‘n effense kinkel. Die atmosfeer is rustig, onpretensieus en Mediterreens.
Sy het in wynkelders in die bekende Napa-vallei in Amerika en in Frankryk en as student in verskeie restaurante regoor die land gewerk.
Waar kom jou belangstelling in kos vandaan?
Dit was seker maar altyd sluimerend as kind, met vier susters wat die heeltyd bak en brou of kosmaak en lekker kompeteer wie se kos die lekkerste smaak. Maar ek dink my twee ouma’s (Sutherland en Gordonsbaai) kon altwee goed kook en ek het altyd vakansies so lekker by hulle geëet as ons Kaap toe gegaan het.
Hoe het jou lewe ná Kokkedoor verander?
Ná Kokkedoor het dit vir my gevoel of ek my welverdiende, bloed-sweet-reputasie as die “Babette Hersant” van die Klein Karoo – wat ‘n bekende skrywer my genoem het – weer moes opbou. Ek was baie ongemotiveerd met kos, maar veral met mense. Ek het ‘n boekkontrak gekry voor ek weg is na Kokkedoor, so ná die hele petalje het ek myself in my boek ingegooi en besluit ek gaan die deelnemers wys wat my so sleg behandel het.
Hoe het die idee vir ‘n resepteboek gekom en hoe voel dit om dit in jou hande te hou?
Dit is die grootste lekker en vervulling en gawe van Bo wat ek kon kry. Dis iets om na te laat vir my kinders, vriende, ondersteuners en dié wat hou van kook en die Klein Karoo. Ek het nog altyd gedink ek wil die Klein Karoo laat “proe” of wys soos ons hom ken met sy unieke natuurskoon, kos, wyne, mense, skatte, ryke natuur en kultuur.
Wat was die mees romantiese maal wat jy nog geniet het?
My man het my een keer verras en my in die winter na ‘n wynplaas geneem vir middagete. Daar aangekom, het hulle ons na die ondergrondse kelder geneem en vir ons uit die beste glase rooiwyn gebring en toe ‘n stuk filet met ‘n romerige wildesampioensous by kerslig bedien. Die kos, die dikste servette, die atmosfeer en my liefde vir my man was hemels!
Wat is jou terugvaldis as jy vinnig iets moet kook?
‘n Goeie pasta met coppa, sampioene uit die woude wat ek altyd gevries en reg het en dik jerseyroom met kappertjies en anjovis en vars kruie.
Hoe sal jy jou kosstyl tuis beskryf?
Gemaklik, simplisties, gesond.
Wat was jou slegste maal ooit?
Ek het al baie sleg geëet en gevoel my geld word gemors, maar dan bly ´n mens mos maar stil en dink ‘nooit weer nie’. Maar een maal het ek ‘n vetterige, te ryk Eisbein geëet wat ek vermoed af was. Ek was baie siek en is nou nog skrikkerig daarvoor. Daar was al ander geleenthede ook, maar dit motiveer my om nooit mense te na te kom met hoë pryse nie en net die beste kos te lewer.
Wat is vir jou belangrik by die bediening van kos?
Ek is versot op ‘n spierwit damas-tafeldoek met dik, kunstige blomservette, goeie glase, beste wyn, borde peuselgoed op Wonkiware-borde met my ouma Katy se mooiste silwerware. Die Provensaalse, effens outydse Boere-klassieke manier is vir my bedoel. En ek hou ook soms van oordadigheid met die silwerbakke wat oopskuif, die lang mooiste blink houttafel en my man wat daardie glase vul.
Watter kosreuk herinner jou aan jou ouma en oupa?
Lamsvleis soos blad, gebak in die koolstoof met so ‘n kruie-vleissousie wat my ouma in elke bord oorskep, of my ander ouma se afval met saffraan bedien met klein aartappeltjies op gebakte witbrood of haar skaapskenkel in daardie mooi erdebak.
Wat is trooskos vir jou en hoekom?
Dis alles resepte wat ek in my kookboek ingesluit het: melkkos, ‘n ryk, romerige pasta, ‘n quiche Lorraine, ‘n kaassoufflé.
Watter krui of spesery gebruik jy die graagste in jou kos en watter krui dink jy kry nie genoeg aandag in Suid-Afrikaners se kombuise nie?
Roosmaryn, basiliekruid en platblaar-pietersielie in ‘n blokkie botter om bo-op ‘n aartappel of biefstuk te laat smelt. Salie is ook fantasties en word te min gebruik, veral in gebrande saliebotter vir pasta en so meer.
Wat is jou lewensleuse?
Die lewe is te kort; kleur die lewe vir jouself en jou geliefdes in met lekker kos, wyn en ‘n al fresco-leefstyl. Kuns kom in vele fasette.
Watter een bestanddeel kikker vir jou enige maal op?
Goeie olyfolie
Wat is jou doodsonde met kos?
Vars gebakte brood met egte botter en Maldonsout in moskonfyt gedruk!
Wat is jou een geheim vir ‘n lekker slaai?
Verskillende teksture blare en vars kruie gekombineer met goeie olywe, die sagste feta en dan natuurlik sade soos sonneblomsade, pampoensade en vars kappertjies met die stele aan en alles vars uit die tuin, soos klein tamaties.
Wat is jou gunsteling-kosbestemming?
Griekeland, Spanje en Frankryk.
Is daar een dis wat jy nie eet nie en ook nie graag voorberei nie?
Skaaplewer en beestong.
Wat is jou gunstelingwyn van Joubert-Tradauw en met watter dis drink jy dit graag?
Joubert-Tradauw se hout-gegiste chardonnay saam met ‘n gruyère-slaai, aspersie-quiche, bergsampioen-pasta of geelstert en dan die ”R62” bordeaux-versnit saam met bobotie, kerrie of volstruis met natuurlik ‘n Joubert-Tradauw syrah by ‘n stukkie beesfilet of lamsboud.
Wat is jou gunstelingkombuisgereedskap?
‘n Ballonklitser.
Beate Joubert se waatlemoenslaai-resep uit Proe die Klein Karoo deur Struik Lifestyle:
Waatlemoenslaai met jenewer en kruisement
Bedien 10
Bestanddele
20 stukke koue, krakerige waatlemoen
2⁄3 k jenewer
‘n hand vol pampoensaad, gerooster
‘n hand vol sesamsaad, gerooster
‘n hand vol sonneblomsaad, gerooster
4 fetasirkels met swartpeper, grof gebreek
1 k swart olywe, ontpit en in halwes gesny
‘n hand vol kappertjiesaad, diepgebraai
Slaaisous
1 k Bulgaarse jogurt
fyngekapte kruisement, na smaak
Metode
Plaas die waatlemoenstukke in ‘n bak, sprinkel die jenewer oor en plaas dit in die yskas tot verkoel.
Berei intussen die slaaisous voor deur die jogurt met die gekapte kruisement te meng.
Pak die waatlemoenstukke op ‘n plat opdienbord en sprinkel die pampoen-, sesam- en sonneblomsaad oor. Rangskik die feta, olywe en kappertjiesaad bo-op. Skep lepels vol van die slaaisous oor die slaai en garneer met kruisement.
Hierdie verbeeldingryke slaai met die kontrasterende kleure het my tannie Nolene altyd gemaak en hierdie resep is my weergawe. Laat bloot die alkohol weg indien die kinders saam eet. Dis ‘n ‘n verfrissende al fresco-slaai.
.jpg)
SOURCES
Penguin Random House South Africa (Pty) Ltd 2015 / Sean Calitz
