Grenadellakolwyntjies

Grenadella is altyd lekker. Probeer dit in dié gewilde lekkerny

24 kolwyntjies

KOEK
500 ml (2 k) koekmeel
15 ml (1 e) bakpoeier
knypie sout
4 eiers, geskei
250 ml (1 k) strooisuiker
125 ml (½ k) olie
1 25 ml (½ k) grenadellavrugtesap (Woolworths)
220 g (2 x 110 g) grenadellapulp
2 ,5 ml (½ t) grenadellageursel (spesialiteitswinkels)
GRENADELLAVERSIERSEL
200 g sagte wit margarien
30 ml (2 e) volroommelk
80 ml (1/3 k) grenadellapulp
750 ml (3 k) versiersuiker, gesif

Metode

Stel oond op 180 °C

1. Koek Sif koekmeel, bakpoeier en sout saam in bak.
2. Klits eiergele en strooisuiker tot liggeel met elektriese klitser.
3. Voeg olie, grenadellavrugtesap, -pulp en -geursel by eiergeelmengsel. Klits vir twee minute.
4. Roer gesifte koekmeel by eiergeelmengsel.
5. Klits eierwitte tot styf, maar nie droog nie. Vou geklitste eierwit by beslag in.
6. Gebruik standaardgrootte muffinpannetjies en voer met wit muffinpapiertjies uit.
7. Skep muffinpapiertjies nie meer as ¾ vol beslag nie.
8. Bak vir 17 minute of tot toetspen skoon uitkom.
9. Haal uit muffinpannetjies en laat heeltemal afkoel.
10.  Grenadellaversiersel Room margarien met elektriese klitser vir ongeveer vier minute.
11. Voeg melk, grenadellapulp en 250 ml (1 k) versiersuiker by en klits vir nog vier minute tot goed romerig.
12. Voeg oorblywende versiersuiker bietjiesgewys by. Hou aan klits tot versiersuiker goed romerig is.
13. Smeer of spuit versiersuiker op kolwyntjies en sit voor soos verkies.