Gerookte hoender-en-soetrissie-quiche

Hoender en soetrissiesous is ’n heerlike kombinasie. Probeer hierdie gerookte hoender-en-soetrissie-quiche

Deur MARLO KITSHOFF-CARSTENS

8 porsies

BROSKORSDEEG

500 ml (2 k) koekmeel

knypie sout

190 g botter

1 eiergeel

90 ml (6 e) yswater

5 ml (1 t) suurlemoensap

VULSEL

bietjie olie

2 uie, gekap

5 ml (1 t) vars knoffel, gekap

80 ml (1/3 k) soetrissiesous (sweet chilli sauce)

2 groot gerookte hoenderborsies, in

skyfies gesny

2 grasuie, gekap

4 ekstragroot eiers

250 ml (1 k) suurroom

125 ml (½ k) volroommelk

1 ml sout

knypie swartpeper

LEES OOK: Quiche Lorraine

Stel oond op 180 °C.

1. Broskorsdeeg Sif koekmeel en sout saam. Vryf botter met vingerpunte in koekmeel tot mengsel soos broodkrummels lyk.
2. Klits eiergeel, water en suurlemoensap saam en voeg by meel-en-botter-mengsel tot deeg vorm.
3. Bedek deeg met kleefplastiek en verkoel een uur in yskas.
4. Rol deeg op meelbestrooide oppervlak uit tot ongeveer 4 mm dik en voer ronde losboomkoekpan of -quichepan met 24 cm-deursnee daarmee uit.
5. Prik bodem van tertkors met vurk en voer met bakpapier uit. Vul tertkors met droë boontjies of bakgewiggies. Bak vir 17 minute.
6. Haal waspapier met boontjies uit.
7. Plaas terug in oond vir nog vyf minute om gaar te bak.
8. Vulsel Verhit olie en soteer uie en knoffel tot uie sag is. Verwyder van hitte.
9. Roer soetrissiesous by. Pak een lagie hoender op bodem, gevolg deur ui-en-soetrissie- mengsel.
10. Sprinkel grasuie bo-oor, gevolg deur nog ’n laag hoenderskyfies.
11. Klits eiers, suurroom, melk, sout en swartpeper saam.
12. Giet stadig oor vulsel en bak vir 40 minute of tot net in middel gestol.
13. Sit warm of teen kamertemperatuur voor.