Bobotie

Bobotie is ’n trots Suid-Afrikaanse dis wat nie sommer teleurstel nie. Probeer gerus hierdie resep

Deur MARLO KITSHOFF-CARSTENS, Assistent SUZANNE CROZIER

6 tot 8 porsies

Bestanddele

bietjie olie

2 uie, gekap

5 ml (1 t) vars knoffel, gekap

5 ml (1 t) droë pietersielie

20 ml (4 t) kerriepoeier

5 ml (1 t) borrie

800 g beesmaalvleis

2,5 ml (½ t) sout

0,5 ml swartpeper

45 ml (3 e) blatjang

15 ml (1 e) worcestersous

5 ml (1 t) bruinasyn

125 ml (½ k) sultanas

500 ml (2 k) vars witbroodkrummels

EIERBOLAAG

125 ml (½ k) volroommelk

2 eiers

2 lourierblare

LEES OOK: Eenpotmaalvleisgereg

Metode

Stel oond op 180 °C.

1. Verhit olie en soteer uie, knoffel en pietersielie tot uie sag is.
2. Voeg kerriepoeier en borrie by en soteer vir een minuut.
3. Voeg maalvleis by en braai tot verbruin.
4. Voeg sout, peper, blatjang, worcestersous en asyn by maalvleismengsel.
5. Roer sultanas en witbroodkrummels by. Prut oor lae hitte vir nog vier minute.
6. Skep maalvleismengsel in oondbak van 20 cm x 30 cm.
7. Bolaag Klits melk en eiers saam. Giet oor bobotie.
8. Plaas lourierblare bo-op.
9. Bak vir 40 minute of tot goudbruin en bolaag gestol is.