Wat is ‘n ambassadeur? In die oorspronklike sin van die woord is dit ‘n gesant, wat as die hoogste diplomatieke verteenwoordiger vir ‘n tydperk in ‘n vreemde land geakkrediteer word om haar of sy regering te verteenwoordig
Dis ‘n eeue oue praktyk en toentertyd was ambassadeurs die koning se verteenwoordigers en het namens hom opgetree. Só ‘n diplomatieke pos verg takt en die vermoë om oor grense te kommunikeer. Wat beteken dit om ‘n ambassadeur vir Afrikaans te wees?
Op bl 14 het Maretha Botes met van die betrokkenes by die Projek Afrikaans gesels om meer daaroor te wete te kom. Een deel van die projek is die ambassadeurs vir Afrikaans-projek en soos Maretha dit stel is “[al] die ambassadeurs … op die een of ander manier by die viering van Afrikaans betrokke en hulle leef Afrikaans met passie”. Toe Projek Afrikaans my ‘n paar maande gelede genader het om as een van die ambassadeurs op te tree, het ek eers daaroor gaan nadink voor ek ingestem het. As daar een ding in die lewe is waaraan ek ‘n kleintjie dood het, is dit om in ‘n boks gedruk te word en soos die res van ‘n groep gesien te word. Ek is glad nie ‘n kuddedier nie. Om my in die Afrikanerboks te druk, gaan nie werk nie. Daardie boks is vir my heeltemal te klein. Ek is veel meer as net dit. Ek is ‘n mens. Een wat onder meer Afrikaans praat. Ek gebruik taal as ‘n simboliese stelsel om mee te kommunikeer. En ek wil nie net in een taal kan kommunikeer nie.
Dat ek tuis voel in Afrikaans, is so. Ek kan my ten beste daarin uitdruk. Maar ek wil dit nooit as ‘n eksklusiewe magsmeganisme verteenwoordig nie. Net soos alle mense wat Duits, Engels, Frans, Zoeloe, Xhosa, of watter taal ook al as moedertaal het, verskil dié van ons wat Afrikaans praat binne die groep dikwels wesentlik van mekaar, as gevolg van persoonlikheid, ingesteldheid, oortuiging, denke, opvoeding, agtergrond, ideologie en waardes. So, hoe lyk my Afrikaans?
Ek hoop die Afrikaans wat my verpersoonlik en wat ek verteenwoordig, is nie verkramp, eenogig, behoudend, veroordelend, benoud en eksklusief nie. Op enige plek waar diskriminasie van watter aard ook al voorkom, voel ek nie tuis nie. Hoe leef ek in Afrikaans? Verdraagsaam. Sonder kleur-, geslags-, geloofs- of finansiële diskriminasie of grense. Integriteit, eerlikheid, opregtheid, medemenslikheid en kritiese denke bepaal my waardestelsel en is die grondslag waarop ek my menswees bou. My projek? As redakteur van Vrouekeur streef ek en die redaksionele span om saam met die tydskrif se medewerkers gehalte-leesstof aan mense oor vele grense te bring. Op daardie manier hoop ek om van die samelewing ‘n beter plek vir alle mense te maak.
Klik hier om Afrikaans.com se webwerf te besoek om meer uit te vind oor die Projek Afrikaans
Eldaleen is die redakteur van Vrouekeur.
