
Mareli Visser, wenner van die eerste Koekedoor-reeks en skrywer van die boek, Uitgerys, het by Die Khaya ’n demonstrasie oor hoe om die perfekte brood te bak, gelewer. By haar staan Tannie Poppie, self ’n televisiester en kookboekskrywer en Mareli se ma, Marieta Cilliers
Die 18de US Woordfees is van 3-12 Maart op Stellenbosch gehou. Vanjaar se tema was “Wys” en kunstenaars het die tema in hul kunswerke, musiek en selfs films uitgebeeld.
Deur Maryke Roberts
Foto’s Clifford Roberts
Die 18de US Woordfees is vroeër vandeesmaand op Stellenbosch gehou. Vanjaar se tema was “Wys” en kunstenaars het die tema in hul kunswerke, musiek en selfs films uitgebeeld. Die totale kaartjieverkope was vanjaar 12% hoër as verlede jaar.
Twee nuwe venues – die Jan Marais-natuurreservaat en die Cloetesville Hoërskool – is vanjaar ook by die venues ingesluit en het baie goed gewerk.
Weg met Marcel van Heerden en Tinarie van Wyk Loots is die verhaal van ’n akteur, Pierrot, en sy muse, Columbine. Dis ’n requiem vir ’n geliefde en ’n besinning oor ’n lewe op die verhoog. Tinarie het in verskeie produksies opgetree en Marcel het ’n welkome debuut gemaak by die fees.
Mareli Visser, wenner van die eerste Koekedoor-reeks en skrywer van die boek, Uitgerys, het by Die Khaya ’n demonstrasie oor hoe om die perfekte brood te bak, gelewer. Verskeie ander demonstrasies deur onder meer sjef Bertus Basson, Annatjie Melck, Flori Schrikker, Koelsoem Kamalie, Peter Veldsman, Errieda du Toit, Heleen Meyer en Corli Botha, is ook gehou.
Woord-en-wyn-etes is in samewerking met die Stellenbosch Wynroete by Delheim, Middelvlei en Simonsig gehou en by die Weltevreden Waenhuis is verskeie produksies waaronder Die Sneeukoningin en Technopop opgevoer.
PG du Plessis se Koöperasiestories is vir die fees deur Alexa Strachan verwerk en het Chris van Niekerk, Marion Holm, Margit Meyer-Rödenbeck, De Klerk Oelofse en Carel Nel in die rolverdeling. Dis nostalgie op sy heel beste, want wie kan die sêgoed van Mietie, Veldsman en Genis vergeet?
Daar was interessante stukke, soos die Nagwandelaars, waar jy laataand op Annandale wynlandgoed bymekaargekom het en ’n spookstorie met ’n verskil gehoor het.
Ook Die Fliek, ’n debuut-drama by die fees met Carel Nel, Cintaine Schutte en Dean Balie. Die gehoor was deel van ’n fliek-teater en die wel en wee van drie baie droewige karakters het soos ’n rolprent voor hulle afgespeel.
Ooms, So ry Miss Daisy, Laurika Rauch met Loki Rothman: Blou en die program Ballades, waarin verskeie bekende kunstenaars opgetree het, was die topverkopers en het voor uitverkoopte sale gespeel. Die veelbesproke stukke soos Wild, Sing jy van bomme, Piekniek by Dingaan en Martelsang het heelwat groei in kaartjieverkope gehad,” sê Saartjie Botha, feesdirekteur.
By die Bloekomhoek is daar saans lekker musiek gemaak en by die Sasol Kunsmuseum was daar elke oggend ’n nuwe opskiet-uitstalling. Athi-Patra Ruga was die feeskunstenaar en verskeie ander solo-uitstallings is by galerye regoor Stellenbosch gehou.
Die wenners van die US Woordfees se WoordTROfees word op 25 April aangewys.

Kate Arthur se Momento Mari in Blue and White, was een van die kunswerke op uitstalling by die Sasol Kunsmuseum, onder die titel die Potblou/Blou Pot, waarvan Alex Hamilton die kurator was.

Wessel Pretorius vertolk een van die vele rolle in sy produksie, Die Ontelbare 48.

John Miles in gesprek met Thys Human oor sy nuutste boek, Op ’n dag ’n hond, in die ATKV-Boektent.

PG du Plessis se Koöperasiestories met Chris van Niekerk, Marion Holm, Margit Meyer-Rödenbeck, De Klerk Oelofse en Carel Nel in die rolverdeling het vir groot trane-afvee gesorg.

Die Jan Marais-natuurreservaat was vanjaar ’n nuwe venue en met die son wat oor die berge ondergaan, het dit ’n heerlike buitelug-ervaring verseker.

Waldemar Schultz en Sandra Prinsloo in Pa, maak vir my ’n vlieër, Pa.

Tobie Cronjé en Gerber Kamper speel twee ooms wat uit ’n ouetehuis probeer “ontsnap”, in die komedie, Ooms. Hulle vorm ’n gedugte span – 30 jaar nadat hulle laas saam op die verhoog was.

Maryke is ’n ervare joernalis, wat haar liefde vir reis, mense, boeke, teater en lekker kos en wyn, op hierdie manier kan uitleef. Sy was al op elke uithoek van die aardbol – bo die wolke; in ’n lugballon; onder die water in ’n duikboot en onder die grond in tonnels – en gaan nêrens sonder haar reisgenoot, eggenoot en mede-joernalis, Clifford nie. Sy glo die lewe is te kort vir slegte koffie.