Mariana Muller, ‘n lewensafrigter, gee die volgende raad:
Ansja Ferreira
1. Kry ‘n eetplanstrategie in werking Dit is belangrik om eers al die faktore te identifiseer wat jou eetplan normaalweg in die wiele ry voordat jy ‘n eetplan aanpak. As jy sterk en gemotiveerd voel, is dit makliker om versoekings te weerstaan. Maar as jy swak of impulsief voel, kan jy makliker in ‘n strik trap. Negatiewe faktore soos finansiële probleme, gesondheid, werkstres, verhoudings- en familieprobleme asook positiewe faktore soos vakansies, sosiale geleenthede en vieringe kan enige dieet laat misluk. Sonder ‘n strategie om moeilike situasies te hanteer, gaan enige eetplan misluk.
2. Eet meer kosse met laekilojoule-digtheid (lae-KD) Eet meer kos met lae-KD soos groente en vrugte met baie vesel en minder kilojoules per gram waarvan jy groter porsies kan eet. Sjokolade het byvoorbeeld ‘n hoë-KD – baie kilojoules per gram – en maak ‘n mens nie versadig nie. Volgens Die skrywer van gesondheidsboeke Eric R Braverman is speserye voedingstofdig, vol vitamiene en minerale met baie gesondheidsvoordele. Kos se smaak kan verander word met speserye om dit interessant te hou. Kaneel speel byvoorbeeld ‘n rol by bloedsuiker en insulien en kan by tee, jogurt of enige ander disse gevoeg word.
3. Wees geduldig en leer gesonder eet Dit neem smaakknoppies drie tot ses weke om ‘n nuwe smaak aan te leer. As jy nie van groente hou nie, gaan jy dit nie oornag kan verander nie.
4. Drink water Water is een van die goedkoopste, gesondste opsies wat jy tot jou lewe kan toevoeg. Moenie met 2 l water op ‘n dag begin as jy nie gewoond is daaraan om water te drink nie. Begin eers met byvoorbeeld twee glase water en vermeerder dit stelselmatig. Volgens The Institute of Medicine is voldoende inname vir mans omtrent 3 l vloeistof per dag en vir vroue omtrent 2,2 l per dag. Volgens inligting op die Mayo-kliniek se webwerf hoef dit nie agt glase water per dag wees nie, maar agt glase vloeistof per dag. Die kleur van urine kan ‘n aanduiding wees van voldoende vloeistofinname. Donker urine kan beteken jy neem te min vog in.
5. Eet ‘n goed gebalanseerde ontbyt Dit het ‘n positiewe invloed op bloedsuikervlakke en verminder die kanse om later in die dag aan verkeerde kosse weg te lê.
6. Beveg hardlywigheid Hou jou verteringstelsel gesond. Drink voldoende water, eet genoeg vesel en oefen. ‘n Dieet hoog in vet en laag in vesel kan jou metabolisme vertraag. Eet veselryke kos saam met eiers, kaas en vleis. Magnesium is nodig vir gesonde spierwerking, meer spesifiek die ontspanning van spiere, en kalsium is nodig vir sametrekking. Die verteringstelsel is uitgevoer met spiere wat saamtrek en ontspan om die kos te laat deurbeweeg. Veral in stresverwante hardlywigheid, kan dit wees dat die spiere nie voldoende ontspan ná peristalse nie.
7. Eet stadig en aan tafel Dit neem 20 minute vir jou brein om die boodskap vanaf jou maag te ontvang dat jy versadig is. ‘n Mens se brein paar sekere goed met mekaar oor tyd. As ‘n mens byvoorbeeld voor die TV sit en eet, wil jy later elke keer eet as jy voor die TV sit.
8. Begin ‘n oefenprogram en hou daarby Oefening hou baie voordele vir die liggaam in. Behalwe vir vetverbranding en ‘n verbeterde liggaamsvorm is oefening ook ‘n “natuurlike antidepressant” wat jou gemoedstemming verbeter.
9. Kies ‘n oefenprogram wat vir jou werk Daar is verskeie oefenmetodes wat tans gewild is soos Crossfit, Sweat 2000, gimnasiumklasse, Pilates, joga en dames-oefenklubs. As dit moeilik is om gemotiveerd te bly, kry ‘n persoonlike fiksheidsafrigter wat jou kan help om ‘n begin te maak. As jy onaktief is, is dit raadsaam om nie dadelik met ‘n harde oefenprogram te begin nie. Raadpleeg altyd eers jou dokter voordat jy met ‘n oefenprogram begin.
10. Wees positief en ervaar die voordele ‘n Gesonde liggaam huisves ‘n gesonde gees. Positiewe gedagtes lei tot positiewe optrede wat in ‘n positiewe uitkoms omsit en net so is die omgekeerde waar. ‘n Mens kan binne sekondes jouself in ‘n negatiewe gemoedstoestand indink deur aan ‘n slegte voorval in jou lewe te dink. Omring jouself met positiewe mense.
Nog wenke vir ‘n gelukkiger 2016
· Leer om geleenthede raak te sien en gryp dit aan.
· Leer uit jou foute. Kry hulp as jy agterkom dat jy dieselfde foute oor en oor maak.
· Vermy negatiewe mense.
· Doen iets aan jou situasie. Deur net te sit en niks te doen nie, gaan jou nêrens bring nie. Deur harde werk en deursettingsvermoë sal jy sukses behaal.
· Hou op om jou geluk by ander mense te soek of om ander mense te blameer as jy nie gelukkig is nie. Jy en jy alleen kan vir jou geluk verantwoordelik gehou word.
· Stel vir jouself doelwitte, byvoorbeeld: “Ek gaan moeite doen om nuwe vriende te ontmoet voor die einde van ‘n spesifieke datum.” Skryf dit neer en volg gereeld op of jy jou doelwitte bereik het. Plak dit op jou yskas en kyk elke dag daarna.
· Moenie opgee nie. Almal word teleurgestel en ervaar mislukkings. Net omdat dit ‘n paar keer gebeur het, beteken nie dit gaan elke keer gebeur nie. Deursettingsvermoë is van groot belang. Aanhouer wen.
Beck, J The Diet Trap Solution: Train your brain to lose weight and keep it of for good
Kontak Mariana by [email protected]
of besoek thebmisolution vir meer info
