Julie was nasionale spaarmaand in Suid-Afrika, maar daar heers kommer omdat baie Suid-Afrikaners min of niks spaar nie. Ons praat met ’n kenner
Hoe spaar jy as jy niks geld aan die einde van die maand oor het vir spaar nie? Ons het vir Ilse Smuts, hoof van bemarking by FNB Kernbankoplossings, ’n paar vrae rondom spaar gevra.
Maak seker dat jy op ’n realistiese bedrag besluit om maandeliks te spaar wanneer jy aanvanklik jou begroting opstel
Wat is die beste manier om te spaar?
Die beste manier om te spaar, is om seker te maak jou spaarplan word rondom jou behoeftes ontwerp. Alle huisgesinne se inkomste en uitgawes verskil.
Maak seker dat jy op ’n realistiese bedrag besluit om maandeliks te spaar wanneer jy aanvanklik jou begroting opstel en neem in ag dat daar skielik onvoorsiene uitgawes soos huistoestelle wat breek, kan wees.
Sodra jy op ’n realistiese bedrag besluit het, aktiveer ’n geskeduleerde betaling sodat jy verseker is van ’n gespaarde bedrag elke maand.
Wanneer jy moet kies tussen verskeie spaar- of beleggingsrekeninge, onthou dat produkte vir spesifieke behoeftes ontwerp word. Sommige banke maak dit moontlik om ’n bedrag te spaar vir elke transaksie wat jy doen.
“FNB het byvoorbeeld Bank your Change as ’n waardetoegevoegde produk ontwerp. Dit stel jou in staat om outomaties te spaar elke keer as jy met ‘n tjekkaart betaal. Wanneer jy byvoorbeeld vir inkopies betaal en die totaal is R467,23, rond die bank die transaksie af na die volgende rand en word die “kleingeld” van 77c na jou spaarrekening (Savings Pocket), wat aan jou tjekrekening gekoppel is,oorgedra. Jy sal verbaas wees om te sien hoe vinnig jou oorskietsente in honderde en selfs duisende rande omsit, veral as jy kies om sommer nog R2, R5, R10, R20 of selfs R50 per transaksie by te sit om jou spaarplan ’n stewige hupstoot te gee.
Die toeganklikheid tot jou geld moet die bepalende faktor wees wanneer jy jou spaarrekening kies. Wanneer jy byvoorbeeld vir jou aftrede spaar, moet jy die minimum tot geen toegang tot die geld hê nie terwyl jy tydens noodgevalle vinnige toegang tot jou geld benodig.
Buiten die gewone spaarraad is dit belangrik om nie te vergeet dat klein bedrae ’n groot verskil kan maak nie. Ken jou bank se dienste en produkte. Baie banke het produkte en dienste wat tot addisionele besparings kan bydra.
Onthou om na die fyn skrif te kyk. As jy die verkeerde produk kies en jy moet dringend die geld bekom of net gereelde bedrae deponeer, kan jy boetes betaal as die gekose rekening dit nie toelaat nie.
Hoe kan ek aanhou spaar as my salaris nie by al die ander prysstygings byhou nie?
Een van die min maniere om ’n opbrengs plus 3% of 5% op inflasie te bekom, is as jy in eiendom en/of aandele belê met die wete dat hierdie soort beleggings nie onmiddellike en vinnige opbrengs gaan lewer nie. Dis egter vir baie buite bereik en daarom is dit belangrik om jou begroting en maandelikse betalings noukeurig na te gaan.
Indien enigsins moontlik, gaan sien ’n finansiële adviseur om maniere te soek om te kan spaar en die beste beleggings te maak. As dit nie moontlik is nie, is daar ander maniere om koste te bespaar.
• Kies ’n praktiese foonkontrak – as jy werklik wil spaar, is dit onnodig om die duurste pakket uit te neem. ’n Pay as you go-opsie is altyd die beste as jy jou selfoonkoste wil reguleer.
• Herevalueer jou risiko en maak seker dat jy nie meer vir versekering betaal as wat nodig is nie.
• Spaar bankkoste. Onthou digitale platforms is oor die algemeen goedkoper en dat opsies soos FNB se Cash@Till toelaat dat jy verniet of goedkoper geld kan onttrek as by ‘n kitsbank.
Al kan jou salaris nie by inflasie byhou nie, is dit ideaal om in ’n inflasie-gekoppelde depositorekening, wat geen gelde hef nie, te belê. Op dié manier sal jou spaargeld gelyk breek met inflasie. Onthou, elke bietjie spaar help.
Hoe spaar ek vir my kinders se opvoeding?
Die daaglikse uitgawes wat met ’n kleinding gepaardgaan, is genoeg om enige nuwe ma tydelik van langtermynverantwoordelikhede te laat vergeet.
Ongeag of jy vir die eerste keer ma geword het en of jy al bietjie ervaring op jou kerfstok het, daar is altyd onvoorsiene uitgawes. Dit veroorsaak dikwels dat spaar vir groter langtermynuitgawes soos studiegelde en ’n eerste voertuig nie die aandag kry wat dit verdien nie.
BEPLAN VOORUIT
Begin vroeg reeds voorberei en spaar vir die toevoeging tot jul huisgesin. Dit sal verseker dat die finansiële trefkrag kleiner is as die groot dag aanbreek. Moet ook nie vergeet dat kinders se uitgawes toeneem namate hulle ouer word nie. Hou die klein jakkalsies, soos babadoeke, skoolgelde en sakgeld, wat maklik ’n gat in jou beursie kan grawe, in ag.
KIES DIE REGTE BELEGGING OF SPAARREKENING
Dit is belangrik om aspekte soos risiko en toegang tot geld in ag te neem as jy ‘n rekening oopmaak. Daar is ’n baie lae risiko aan kontantbeleggings verbonde, maar jou geld gaan stadiger groei teenoor geld wat op die aandelemark belê is.
GEBRUIK SAAMGESTELDE RENTE TOT JOU VOORDEEL
As jy spaar en belê terwyl jou kind nog jonk is, sal jy die vrugte van saamgestelde rente pluk. Begin vroeg spaar en herbelê die rente wat jy op die aanvanklike bedrag verdien. Op dié manier sal jy rente op rente verdien.
SKEDULEER BETALINGS
Met geskeduleerde betalings hoef jy jou nooit daaraan te herinner om te spaar nie. Monitor jou uitgawes vir ’n maand of twee om te bepaal wat ’n realistiese bedrag is om elke week/maand te spaar. Aktiveer dan ’n geskeduleerde betaling vir die bedrag wat op die datums wat jy aangedui het, die geld na die gekose rekening sal oordra. Geskeduleerde betalings werk fantasties omdat dit verseker dat jy nie onnodig geld bestee nie, maar wel elke maand spaar. Dis belangrik om te onthou dat vaste deposito’s dikwels nie toelaat dat bykomende geld gedurende die depositotermyn belê word nie. Kies ’n rekening wat in jou behoeftes gaan voorsien of anders kan jy ’n addisionele rekening oopmaak om maandeliks in te spaar.
LEER UIT ANDER SE ERVARING
Moenie die waarde van jou vriendinne wat reeds kinders het se spaarraad onderskat nie. Dis ook slim om onder mekaar artikels te deel, veral klere en speelgoed wat vinnig ontgroei word.
Vermy die klein uitgawes wat bloot tydelik oulik is en moenie net spaar wat aan die einde van elke maand oorbly nie.
