Candice Breitz en Mohau Modisakeng verteenwoordig Suid-Afrika vanjaar op die 57ste Venesiese Biënnale
Deur JOHAN MYBURG
Die Venesiese Biënnale het 13 Mei in dié Italiaanse waterstad begin en die werk van twee kunstenaars, Candice Breitz en Mohau Modisakeng, word vanjaar in die Suid-Afrikaanse paviljoen vertoon.
Dié vertoonvenster van hedendaagse kuns – daar is mense wat meen dit is die belangrikste ter wêreld – word sedert 1895 elke tweede jaar (met onderbrekings tydens die twee wêreldoorloë) aangebied.
Nadat Suid-Afrika in 1968 amptelike deelname aan die Biënnale ontsê is, het die land in 1993 en 1995 weer deelgeneem. Daarna was daar vir 16 jaar geen amptelike deelname nie tot en met 2011 toe die Suid-Afrikaanse paviljoen swaar getrek het weens talle ongerymdhede. In 2013 het die departement van kuns en kultuur op die nipper die Nasionale Kunstefees aangewys om ʼn uitstalling vir Venesië byeen te bring.
In 2015 het die argiteksfirma Mashabane Rose en die Apartheidsmuseum – op nóg korter kennisgewing – opdrag gekry om ʼn uitstalling te reël wat hulle met heelwat sukses gedoen het.
Vanjaar het die departement betyds sy planne agtermekaar gekry en Connect Channel Pty (Ltd) – alom bekend as Connect, ʼn digitale-inhoud- en televisiemaatskappy en met Basetsana Kumalo as uitvoerende hoof – aangewys as die instelling wat dié taak moes uitvoer.
Die twee kurators wat die Suid-Afrikaanse paviljoen in die Arsenale ingerig het, is Lucy MacGarry en Musha Neluheni. Hul sobere benadering het daartoe gelei dat die werk van net twee kunstenaars – teenoor ʼn hele rits in die laaste twee tentoonstellings – vertoon word.
Boonop strook hul aanbieding met die oorkoepelende tema vir die 57ste Biënnale, “Viva Arte Viva”, soos voorsien deur Christine Macel, die Biënnale-kurator. Macel se oogmerk is immers om kuns en die kunstenaars wat die kuns maak, weer in die kollig te kry.
Breitz (44) woon in Duitsland waar sy sedert 2007 professor aan die Braunschweig-kunsskool is. Sy fokus die afgelope ruk op video-installasies waarin sy gebruik maak van filmmateriaal uit hedendaagse en populêre kultuur, soos rolprente. Sy verken aspekte soos individualiteit, deel wees van (verbeelde) gemeenskappe en veral die effek wat dié deelname op konstruksies van ras, gender en godsdiens het.
Breitz het in 2012 die uitstalling Extra! in Johannesburg aangebied en was in 2015 die kunstenaar in die kollig op die Joburg Art Fair.
Modisakeng (30) bied einde Junie ʼn solo-uitstalling in Grahamstad aan as Standard Bank se jong kunstenaar vir visuele kunste. Sy werk was in 2015 deel van Christopher Till en Jeremy Rose se Biënnale-uitstalling. Hy is bekend as performance-kunstenaar en werk ook in fotografie en video.
Modisakeng ondersoek in sy werk aspekte van identiteit soos dit gestalte kry in die lyf van die swart man in ʼn post-apartheid-samelewing. Sy werk eggo verhale van trauma en geweld en ʼn mens kan sy werk kwalik anders beskryf as ʼn weergawe van pyn, intense stilte en melancholie.
Breitz sowel as Modisakeng het nuwe werk vir die Biënnale voorberei.
MacGarry was voorheen kurator van die Joburg Art Fair en Neluheni is waarnemende hoofkurator van die Johannesburgse Kunsmuseum. Benewens aansienlik meer tyd en beweegruimte – wat hulle die geleentheid bied om nuwe werk van die kunstenaars aan te vra – het dié duo ook die ondersteuning van die multidissiplinêre projekbestuurateljee Parts & Labour sowel as dié van !Kauru African Contemporary Art Project.
Die Venesiese Biënnale duur tot 26 November. Besoek die webwerf by www.thesouthafricanpavilion.co.za.
0526 vk1 venice
Candice Breitz Foto: Till Cremer
0526 vk2 venice
