‘n Nuwe ontwikkeling van Google bring nou die natuur tot op jou rekenaar-, foon- of tabletskerm.
Maryke Roberts
Al was jy nog nooit op Tafelberg nie, kan jy nou – tree-vir-tree – die bekendste voetpaadjies langs die kranse loop en oor die stad uitkyk, Suid-Afrika se gewildste strande besoek, en selfs ‘n safari deur die Nasionale Krugerwildtuin onderneem – alles in die virtuele wêreld en in die gerief van jou huis of kantoor.
Google Suid-Afrika se nuutste toevoegings tot Street View, aaneen-foto’s van spesifieke roetes op sy kaart- en navigasieblaaie, is onlangs in die Tafelberg Nasionale Park aan gaste bekendgestel. Die projek, Mzansi Experience – Discover South Africa on Google Maps, is in samewerking met SANParke aangepak en sluit nou drie van die land se bekendste nasionale parke in, terwyl meer parke binnekort bygevoeg sal word.
Derek Hanekom, minister van Toerisme, het by die geleentheid gesê dat hierdie tegnologie mense se drang na reis sal stimuleer en boonop aan die land die geleentheid bied om Suid-Afrika se skoonheid met mense regoor die wêreld te deel, wat dalk nooit die geleentheid sal hê om self die land of dele daarvan te kan besoek nie. Hierdeur het Suid-Afrika een van 66 lande, wat dele van die Noord- en Suidpool insluit, geword waar hierdie tipe 360-grade, panoramiese beeld beskikbaar is.
Die projek om van die Suid-Afrika se hoofpaaie af te wyk en sodoende Google se spesiale 360-grade kameras na van die land se mees geliefde plekke te stuur, het ‘n bietjie meer as ‘n jaar gelede begin, vertel Google se Sven Tresp, die Zurich-gebaseerde hoof van die Street View-program. Waar ‘n voertuig nie gebruik kon word nie, is Google se swaar, bal-vormige kamera op ‘n tegnikus se rug gedra.
Foto’s word deur ‘n rekenaarproses aanmekaargeskakel en algoritmes verseker dat gesigte, nommerplate en ander privaat-inligting wat mag vasgevang word, onduidelik gemaak word.
Nou kan jy buiten Tafelberg Nasionale Park en die Krugerwildtuin, ook Kaappunt; die Weskus Nasionale Park; Leeukop en Seinheuwel; die Clifton-, Kampsbaai-, Sunset-, Llandudno- en Boulder’s strande; en, Durban se Goue Myl; op Google Street View besoek.
Die Google-span het gaste by vandeesweek se funksie ook ‘n kykie gegee oor hoe Street View in die klaskamer gebruik kan word. Met behulp van ‘n gratis toep, ‘n tablet en ‘n eenvoudige karton kyk-apparaat, kan die opvoeder ‘n klas op toer neem en meer oor die wêreld leer. Die Virtuele Werklikheidsbrille van karton is reeds in Suid-Afrika beskikbaar.
Kinders kan leer hoe plekke ver van hulle lyk, maar ook hoe baie diere in hul natuurlike habitat lyk. Google se magtige programmatuur sit inligting by die foto’s, waar diere soos luiperde, olifante, pikkewyne en selfs renosters gewaar word.
Alhoewel die foto gedateer word, is dit historiese beelde nie lewendig nie. Daar is dus nie ‘n groter gevaar vir stropery nie, het Paddy Gordon, bestuurder van die Tafelberg Nasionale Park, gaste gerusgestel.
Van die gaste by die geleentheid is Justin Buchmann en Judiet Barnes, albei van SANParks.
Die gassprekers by die funksie is van links: Paddy Gordon, bestuurder van Tafelberg Nasionale Park, Derek Hanekom, Minister van Toerisme, Luke McKend, Google SA bestuurder en Sven Tresp, Google Street View programbestuurder van Switserland.
Paddy Gordon, bestuurder van Tafelberg Nasionale Park, kyk hoe die karton kyk-apparaat werk.
SOURCES
Clifford Roberts
