American Express ervaring

As jy mooi mense, goeie kos en wyn en dié leefstyl wil geniet, is The Lookout Waterfront by die V&A Waterfront in Kaapstad altyd ‘n goeie begin

Deur Maryke Roberts

Foto’s Clifford Roberts

Met sy onbelemmerde uitsigte oor Tafelbaai, die berg wat agter die gebou waghou en altyd iets opwindends wat daar gebeur, kan jy nie verkeerd gaan nie. Veral nie as American Express en goeie wyne in die prentjie is nie.

Verlede week het gaste en American Express kaarthouers, die raar voorreg gehad om wyne te proe van meer as 20 wynplase in familiebesit. Daar was ook nie net wyne nie, maar whiskey, gin en craft bier te proe. Gaste kon voordeel trek uit die kelderdeur-pryse en sommer die wynmakers en persoonlikhede agter die groot wyn-handelsmerke ontmoet.

Daar is tot ná sononder gekuier, nadat gaste aan ‘n Amazing Race-wedloop kon deelneem, waar wynmakers en stalletjiehouers moes help met verskeie leidrade om ‘n walvistoer in Hermanus te wen.

Bonnie Mbuli van Afternoon Express was die seremoniemeester by die geleentheid. By haar staan Nick Hafner van Meridian Wine Merchants.

Adri Roux en Bianca Brand het die Ken Forrester-stalletjie beman, waar gaste ook die Billecart-Salmon sjampanje kon proe. Ken is die enigste invoerder van dié Franse handelsmerk.

Terrence Adendorff en Imaan MacQuena geniet ook die mooi uitsig.

Daar was meer as 20 wynstalletjies van familieplase. Camilla Smith van Cederberg, Martin Lamprecht van Marras en Martin Meinert van Meinert Wines by die geleentheid.

By die Glen Grant en Aperol-stalletjies het ’n groep energieke jongmense gaste bedien. Van links is Keegen Bain, Stacey Ngwenya, Ané Smit en Xhanti Mpu.

Die American Express-ervaring wat by The Lookout Waterfront by die V&A Waterfront gehou is, is die beste vertoonstuk van ’n luukse lewe.

Anlie Janse van Rensburg