Foto: www.pexels.com
’n Kredietkaart is ’n wonderlike ding, maar dit kan jou in groot moeilikheid laat beland. Wikus Oliver, ’n skuldbestuurkenner, gee vir ons raad
Moenie jouself flous nie; ʼn persoonlike kredietkaart is gelykstaande aan skuld, sê Wikus Olivier, skuldbestuurkenner by DebtSafe.
“As jy ʼn kredietkaart gebruik, voel dit so eenvoudig en dit is soveel pret totdat jy deur ‘n verwarde werklikheid getref word – jou onbeheerbare skuldhoop.”
Wikus sê dat jy jouself ʼn belangrike vraag moet afvra: “Hoekom wil jy eintlik ʼn kredietkaart gebruik?”
Hy sê ‘n kredietkaart kan jou later laat wonder hoekom jy dit ooit in die eerste plek gebruik het en hoe jy so vinnig daarin kon slaag om jou finansies in die rooi te kry.
LEES OOK: Help! My maat mors geld
Hy sê dat as jy tans ʼn kredietkaart besit en beantwoord het waarom jy een nodig het, is daar ʼn paar moets en moenies wat jy in ag moet neem. Dit sal jou help om jou kredietkaartgebruik te bestuur asook jou skuld te beperk.
Moets
- Behoorlike finansiële beplanning is noodsaaklik. Dit is ʼn strategiese proses wat jou finansies in toom sal hou. As jy jou kredietkaart gebruik, moet jy vooraf beplanning doen om presies te weet wat die minimum betaling is wat moet terugbetaal word.
- Gebruik jou kredietkaart verantwoordelik deur getrou te betaal. Dit sal jou krediettelling verbeter en aanhelp. Indien jy een betaling mis, kan dit ʼn negatiewe effek op jou kredietprofiel hê.
- As jy jou kredietkaart vir lojaliteitsvoordele wil gebruik, gebruik dit soos ʼn debietkaart. Moenie toelaat dat dit krediet word nie, handhaaf eerder ʼn positiewe balans. Jy kan selfs rente op ʼn positiewe balans verdien.
- Probeer om meer as die minimum bedrag elke maand te betaal, waar jy kan. Dit sal verseker dat jy nie net die ‘huur’ van wat jy skuld delg nie, maar ook sorg dat jy ʼn goeie krediettelling saamstel.
- As die kredietooreenkoms nie bekend gemaak word nie, vra dit aan en maak seker dat jy dit heeltemal verstaan. Byvoorbeeld: Wat is die minimum bedrag/paaiement wat jy moet betaal? Watter rentekoers sal van toepassing wees en wat is die addisionele fooie en heffings wat jy kan verwag?
- Jy moet bewus wees van al die voor- en nadele van die ooreenkoms.
- Bêre jou kredietkaart vir nood. Baie verbruikers het nie die kontantvloei om ʼn behoorlike noodfonds te bou nie. ʼn Kredietkaart kan baie nuttig wees in hierdie tipe situasies. Bly weg van spandabelrigheid op jou kredietkaart.
Moenies
- Moenie jou kaart links en regs swaai nie. Dit is gans te maklik en kan groot verwarring veroorsaak wanneer dit by jou krediettelling kom. Om te veel op jou kredietkaart staat te maak, toon ʼn gebrek aan finansiële beplanning en kan jou toegang tot ander krediet, soos huislenings of voertuigfinansiering, negatief beïnvloed.
- Alhoewel ʼn kredietkaart se lojaliteitspunte jou opgewonde kan maak, weeg dit op teenoor jou finansiële stabiliteit. Is die koste (wat deur onnodige en oormatige uitgawes gedoen word) die moeite werd om jou finansies in die drein af te stoot? ʼn Goeie en ‘gesonde’ bankrekening beteken meer as die hoeveelheid lojaliteitspunte wat jy ophoop. Dit is niks anders as ʼn aansporingskema van die banke om jou kredietkaart meer te gebruik sodat hulle rente op jou skuld kan verdien.
- Moenie ʼn betaling oorslaan nie – daar is ekstra kostes hieraan verbonde en jou krediettelling kan in die hek duik.
- Moenie jou kredietlimiet oorskry nie, want jy sal ʼn boete moet betaal. Sodra ʼn kredietkaart oorskry is, is dit baie moeilik om die balans te verminder. Dit sal maande duur om jou kredietkaart se balans weer tot op nul te kry.
- Moenie jou kredietkaart gebruik as jy kontant by ʼn OTM wil onttrek nie, gebruik eerder jou debietkaart.
Onthou, ʼn kredietkaart is ‘duur’ skuld. En as jy behoorlike en pro-aktiewe finansiële beplanning vermy wat daarmee gepaardgaan, kan dit groot verwarring veroorsaak, sê Wikus.
DebtSafe is ʼn geregistreerde skuldberader: Besoek www.debtsafe.co.za, 0861 100 999, [email protected] of SMS jou naam en “info” na 30898 (gratis SMS)
