Die fleksitariese dieet

’n Paneel van gesondheidskenners in die VSA het 40 diëte bekyk en hierdie dieet is derde geplaas wat gesonde eetplanne betref  

Om onder die beste diëte te tel, moet die dieet gesond wees, maklik om te volg, voedend en doeltreffend wat gewigsverlies betref.

Hoe werk die dieet ?

Fleksitariese etes wentel om plantproteïen eerder as diereproteïen. As jy ’n fleksitariër word, voeg jy vyf voedselgroepe by jou dieet – jy vat dit nie weg nie.

Die vyf groepe is:

1 Die “nuwe vleis”: tofu, bone, lensies, ertjies, neute en sade, eiers en soja
2 Vrugte
3 Volgraankos
4 Suiwel
5 Suiker (natuurlike versoeters) en speserye (alles van droë kruie tot slaaisouse)

Wat kos dit ?

Jy het nie eksotiese bestanddele nodig nie, daarom behoort dit jou nie meer te kos nie. Jy kan ook spaar deurdat jy nie vleis hoef te koop nie. Jy het ook die vryheid om te kies wat in seisoen en vrylik beskikbaar is.

Gewigsverlies en gesondheid

Navorsing toon vegetariërs eet minder kalorieë, weeg minder en het ´n kleiner liggaamsmassa-indeks as hul vleisetende maters. As jy baie vrugte, groente en grane eet, sal jy voller voel op minder kalorieë. Met die minder kalorieë en fisieke oefening sal jy gewig afskud. Hoe vinnig jy dit afskud en af hou, sal van jou afhang. Na bewering weeg vegetariërs 15% minder as hul vleisetende broers en susters. Selfs semivegetariërs weeg minder as vleiseters, volgens ’n studie waarin 38 000 volwassenes ses jaar gevolg is. Hulle het ook minder hartprobleme, diabetes en kanker en leef ongeveer 3,6 jaar langer as vleiseters.   

Die woord fleksitaries is saamgestel uit flexible en vegetaries. ’n Dieetkundige, Dawn Jackson Blatner het reeds in 2009 ’n boek oor dié dieet uitgegee. Sy sê jy hoef nie vleis geheel en al uit jou dieet te sny om die gesondheidsvoordele daarvan te geniet nie – jy kan net die meeste van die tyd vegetaries eet en steeds nou en dan ’n burger of biefstuk geniet as jy lus raak daarvoor.  

Hoe maklik is dit om die dieet om te volg?

Dawn beklemtoon dat die dieet baie maklik is en jy dit ook nie presies hoef te volg nie. Jy moet net op jou vooruitgang fokus. Daar is talle resepte uit haar boek op die internet beskikbaar en dit hoef nie tydrowend te wees om dit te volg nie. Jy mag uiteet en jy mag alkohol gebruik. Die lekker daarvan is juis dat dit buigsaam is en jy nie dag vir dag reëls hoef na te kom nie. As jy uiteet, kies disse wat gebak, gerooster, geposjeer en gestoom is eerder as gebraai, met ’n korsie, geroom, in die skulp gekook en pangebraai. Alkohol kan matig gebruik word, een drankie per dag vir vroue en twee vir mans. Kies ’n ligte bier, glas wyn of een sopie sterk drank met sodawater (nie tonikum nie, want dit bevat suiker). As jy met etes veselryke groente en vrugte en volgraan eet, behoort jy nie tussen etes honger te word nie omdat jy langer versadig sal voel.

Gesondheidsgevare

Tot dusver het daar geen ernstige risiko’s en newe-effekte voorgekom nie, maar as jy ’n bepaalde gesondheidstoestand het of bekommerd is, praat eerder met jou dokter voor jy jou dieet aanpas.

Voorbeeld van hoe jy kan eet

Omdat jy meer op plantproteïen as diereproteïen fokus, kan jou etes op ’n dag só lyk:

Begin met ’n ontbytpap met sojamelk, neute en bessies; boontjiesop met ’n slaai en volgraanrolletjie vir middagete; ’n appel en ’n paar neute vir ’n tusseninhappie; en ’n groenteburger met patattjips vir aandete.

As jy die dag lus is vir vleis, kies maer gehaltevleis, soos hoender of volstruis. Sluit alternatiewe bronne van yster by jou dieet in omdat jy minder vleis eet, soos verrykte ontbytpap (met min suiker bygevoeg), groen blaargroentes soos spinasie, kool en broccoli. Omdat vitamien C ysteropname bevorder, is ’n klein glasie vrugtesap, soetrissie of tamaties saam met etes nodig.

Moets en moenies

Beplan jou etes om tofu, soja , bone, lensies, ertjies, neute, sade en eiers – dit verskaf jo u proteïen vir die dag. Oefen 30 minute per dag vyf dae per week en doen kragoefeninge twee maal per week. Moenie dit oordoen wat alkohol betref nie.   

Voordele van die dieet

Dr Josh Axe is ’n dokter in natuurlike medisyne, chiropraktisyn en kliniese voedingkundige. Hy reken die vier voordele van die fleksitariese dieet is:

1 Jy kan dit vir die hele gesin voorsit. Daar is nie vaste reëls nie. Jy moet net ’n kopskuif maak dat vleis nie nooodsaaklik is vir ’n volledige maaltyd nie, maar nou en dan wel bygevoeg kan word. Moenie daarop fokus om vleis uit te sny nie, fokus eerder op meer groente en vrugte.

2 Jy kan steeds die voordele van diereprodukte geniet Die fleksitariese dieet beteken jy kry al die voordele van ’n plantgegronde dieet plus die voedingswaarde wat diereprodukte bied, soos vleis van vrylopende beeste, skrophoenders, organiese eiers, salm en suiwel. Met ’n vegetariese of vegandieet het jy nie die voordeel van hierdie proteïen nie. Hierdie voedsame gehaltediereprodukte verseker dat jy genoeg proteïen inkry wat nodig is vir spiermassa, om bloedsuiker te stabiliseer, bene sterk te hou en veroudering te vertraag. Vars vis is ook die beste bron van omega- 3-vetsure, wat jou hart beskerm en breingesondheid bevorder.

3 Jy sal jou gesondheid verbeter ’n Dieet wat onverwerkte kos insluit, vleis beperk en verfynde en verwerkte kos uitsluit, hou groot gesondheidsvoordele in. Volgens ’n artikel in The Permanent Journal is plantgegronde diëte kostedoeltreffend en kan LMI- , bloeddruk-, bloedsuikeren cholesterolvlakke verlaag. Dit kan daartoe lei dat mense minder medikasie vir chroniese toestande nodig het. Dit is veral goed vir mense met hipertensie, diabetes, hartsiektes en vetsug. Die dieet kan vir elkeen aangepas word. As jy van ’n vleiseter na ’n fleksitariër oorskakel, sal jy ook oortollige gewig afskud.

4 Jy sal die omgewing bewaar In vergelyking met plante het lewende hawe meer kos, water, grond en energie nodig om te groei en vervoer te word.

Besoek https://dawnjacksonblatner. com/ vir resepte en meer inligting oor die dieet