WAT VERTEL DIÉ PYNE VAN JOU?

Daar is al seker honderde studies oor die verband tussen stres en fisieke kwale gedoen en daar is al bevind dat daar beslis ‘n verband tussen stres en angs en spierpyne, hoofpyne, moegheid en prikkelbaredermsindroom is.

Dr Susanne Babbel skryf in ‘n artikel op Psychology Today dat chroniese pyn nie net deur fisieke beserings veroorsaak word nie, maar ook deur stres en emosionele kwessies.

“Fisieke pyn waarsku ons dikwels dat daar nog emosionele werk in ons lewe nodig is.”

So wat kan hierdie pyne jou van jou lyf vertel?

KOP

As jy jouself oor klein dingetjies verknies of uitdagings probeer oorkom, kan jy met hoofpyne sukkel. Sorg dat jy ontspan sonder om skuldig te voel. Moenie oor jou probleme tob nie.

NEK

Wrokkigheid is ‘n destruktiewe emosie vir jou nek, of dit nou wrokke is wat jy teen ander mense of teen jouself koester. Dis moeilik om te laat gaan en te vergeef, maar jou houding kan ‘n groot verskil maak. Dink oor die dinge waarvan jy hou, jou prestasies en unieke eienskappe na.

SKOUERS

Moeilike besluite kan sy tol op jou skouers eis, of daar nou een of baie besluite is wat jy moet neem. Deel jou stres met iemand anders en praat oor jou probleme. Dit sal help om die druk te verlig.

BORUG

Voel jy ongewaardeerd of ongelief? Dit kan die oorsaak van pyn bo in jou rug wees. Een oplossing is oop kommunikasie. Praat met jou geliefdes oor jou gevoelens.

LAERRUG

Dit is dikwels die gevolg van finansiële bekommernisse. Onthou dat geld nie geluk kan koop nie en ‘n mens het nie rykdom nodig om nou gelukkig te wees nie.

ELMBOË

Mense is van nature skrikkerig vir groot veranderings en gewrigspyn kan die oorsaak van hardkoppigheid wees – ook hardkoppigheid om veranderings te aanvaar. Onthou jy hoef nie die lewe gekompliseerd te maak nie.

HANDE

Mense wat baie alleen is, kan pyn in hul hande ervaar as gevolg van ‘n verlies aan kameraadskap. Probeer nuwe mense ontmoet en gesels met mense.

HEUPE

As mense aan ‘n voorspelbare roetine gewoond is en skielik nuwe situasies moet hanteer, kan hulle pyn in hul heupe ervaar. Dit kan dui op ‘n vrees vir verandering. Dink aan die lewe as ‘n avontuur!

KNIEË

Niemand wil glo hulle dink baie van hulself nie, maar kniepyn kan op ‘n opgeblaasde ego dui. Doen meer vir ander mense en gee vir ander.

KUITE

Hierdie kan dui op verhoudings wat gespanne is, veral as jy besitlik of jaloers optree. Ontspan en leer om jou geliefdes te vertrou.

ENKELS

Hierdie kan daarop dui dat jy jou behoeftes afskeep. Moenie jouself afskeep nie. Bederf jouself en maak jou drome ‘n realiteit.

VOETE

Apatie keer jou liggaam om vorentoe te beweeg. As jy soos ‘n mislukking voel en voel dat als verkeerd gaan, raak jou voete seer. Gee aandag aan die lewe en aan wat mooi is. Gebruik al jou sintuie.

ONTSTRES!

Die webwerf theheartysoul.com sê as jy die volgende keer ‘n pyn voel, dink na oor waar jou stres vandaan kom. Luister na jou liggaam.

BRON: http://theheartysoul.com