Michelle Theron is die Chef de Cuisine by Pierneef à La Motte Restaurant op die La Motte-wynlandgoed op Franschhoek.
Deur Maryke Roberts
Foto’s verskaf
Ná haar sjefstudies het sy by verskeie bekende restaurante gewerk, waaronder De Volkskombuis in Stellenbosch, One.Waterfront en Cape Grace in Kaapstad en Laborie in Paarl.
Pierneef à La Motte Restaurant is onder haar leiding in 2013 aangewys as een van Suid-Afrika se tien toprestaurante in Eat Out DStv Food Network se restauranttoekennings.
Sedert haar aansluiting by die La Motte-span het sy al onder meer in Michelin-sterrestaurante in Nederland soos Chapeau!, De Bokkedoorns en De Vrienden van Jacob gekook.
Waar kom jou belangstelling in kos vandaan en wie het jou belangstelling geprikkel?
As kind het ek reeds geweet dat ek eendag ’n sjef wil wees. Kos en etenstyd was altyd ‘n groot gebeurtenis in ons familie en dit het beslis daartoe bygedra dat ek dit vir ’n lewe wou doen!
Wat is die uitdagings om in ’n nuwe kombuis te begin?
Vir seker om jouself met die regte mense te omring wat jou passie en toewyding deel!
Wat is die grootste uitdaging om kos te maak wat almal se gluten- en neut-allergieë en ander giere in ag neem?
Die beste is om dit nie as ’n uitdaging te sien nie: ek het besluit om hierdie opsies doelbewus op my spyskaart beskikbaar te hê en dit werk baie goed. Gaste met spesifieke voorkeure en behoeftes waardeer dit om te sien dat hul behoeftes in ag geneem word.
Wat is jou terugvaldis as jy vinnig iets moet kook?
Iets soos n tuisgemaakte pastagereg met knoffel, rosatamatie, rissie, vars kruie en ´n goeie kwaliteit olyfolie.
Watter krui of spesery gebruik jy die graagste in jou kos en watter krui dink jy kry nie genoeg aandag in Suid-Afrikaners se kombuise nie?
Ek gebruik graag kaneel, vinkelsaad en mosterd.
Wat was jou mees spesiale/ romantiese maal nog?
Ek is só mal oor eet en lekker kos dat elke ete vir my spesiaal is!! Maar ek dink dit is as sjef altyd ’n belewenis om in ’n top internasionale restaurant te eet en daardie kreatiwiteit en inspirasie te kan beleef.
Watter drie bekende mense sou jy vir aandete nooi en hoekom?
Dominique Crenn van Atelier Crenn-restaurant en Massimo Boturra van Osteria Francescana, maar as ek hulle moet beïndruk, kan ek nie vir ’n derde persoon kook nie!
Wat sou op die spyskaart wees?
Dit kan intimiderend wees, maar vir seker iets van ons erfenis… ’n spyskaart wat ons Suid-Afrikaanse herkoms uitbeeld en ons stories vertel.
Wat is trooskos vir jou?
My ma se kos, maak nie saak wat sy maak nie.
Watter een bestanddeel kikker vir jou enige maal op?
Suurlemoenskil en komyn.
Wat is jou gunstelingkookboek?
Sausage making, a definitive guide met resepte deur Ryan Farr en ook Bar Tartine Techniques and recipes van Nicolaus Balla en Cortney Burns.
Wat is jou doodsonde met kos?
Ek eet grondboontjiebotter skelm uit die bottel!
As jy op ’n Sondagaand onverwags gaste kry, wat maak jy vir hulle?
Kaas en charcuterie en ‘n goeie glas wyn om moed te skep vir die week wat wag!
Wat is jou gunsteling-kosbestemming?
Die geure van Spanje!
Is daar een dis wat jy nie eet nie en ook nie graag berei nie?
Enigiets met appelliefies…
As jy ’n drankie kon wees, wat sou jy wees?
Sjampanje! En gelukkig loop die Franschhoek Vallei oor van heerlike Méthode Cap Classique wyne – enige dag so goed soos die Franse weergawe!
Wat is jou gunsteling-kombuisgereedskap?
My sjefsmes wat al 13 jaar oud is. OOO en ’n Thermo-mix!
As jy nie ’n sjef was nie, watter ander beroep sou jy kon volg?
Fotografie en stilering lyk vir my baie lekker – ek speel graag op Instagram.
Watter vyf bestanddele is altyd in jou spens?
Truffelolie (net ’n druppel maak iets luuks), pastameel vir ´n troosmaaltyd, eiers, balsemieke asyn en olyfolie.
Wat is vir jou belangrik by die bediening van kos?
Lekker wyn op die tafel! En natuurlik moet my gaste gemaklik wees en tuis voel. Ek hou daarvan om spesiale moeite met eetgerei te doen, maar die heel belangrikste is om hartlik te wees!
Wat is jou lewensleuse?
Work hard, be kind.
Na watter sjefs kyk jy op en na wie sal jy gaan vir raad?
Ek is baie bevoorreg om ‘n hele paar sjefs in die bedryf te ken en ek kyk regtig op na almal van hulle. Elkeen is suksesvol in eie reg en ’n mens kan iets by almal leer om jouself te verbeter. Ek vra graag raad by sjef Rudi Liebenbergh van die Belmont Mount Nelson Hotel en sjef Margot Janse van in Le Quartier Francais Franschhoek. Ek het reuserespek vir albei en slaan hul opinies hoog aan.
Wat was die beste raad wat jy al oor kook ontvang het en van wie het dit gekom?
“Doen eers wat jy ken en waarmee jy gemaklik is en daag dan die grense uit.” By Suid-Afrika se eerste Michelen-ster-sjef, Jan-Hendrik van der Westhuizen.
Michelle se ryspoeding-resep uit die Cape Winelands Cuisine-kookboek:
Genoeg vir vier
Bestanddele
2 koppies (500 ml) melk of vars room
1 koppie (250 ml) gekookte rys
1 eetlepel (15 ml) botter
’n Knippie sout
2 eiers, geskei
½ koppie (125 ml) suiker
1 stukkie gedroogde nartjieskil of een suurlemoen se skil gerasper, of 2 teelepels (10 ml) rooswater
¼ koppie (60 ml) gemengde bessies
Metode
Verhit die oond tot 150 ˚C (300˚F). Verhit die melk of room en voeg die rys by. Voeg die botter en sout by.
Klits die eiergele saam met die suiker tot lig en romerig. Voeg die warm melkmengsel by en roer goed. Klits die eierwitte tot styf en vou by die mengsel in. Voeg die nartjie- of suurlemoenskil of rooswater by en ook die gemengde bessies.
Gooi die mengsel in ’n gesmeerde oondpan en bak vir 30 – 40 minute of tot gestol.
