Kim Cox is die sjef by die nuwe praglandgoed buite Bosjes, in die Breederiviervallei naby Ceres
Deur Maryke Roberts
Foto’s verskaf
Die moderne lyne van Bosjes Kombuis het die historiese en argitektoniese teenvoeter van ’n 18de eeuse Kaaps-Hollandse herehuis op ´n protea- en vrugtefamilieplaas geword. Dis ’n tipiese plaaskombuis met ’n eenvoudige, moderne spyskaart, wat vars produkte onderskryf wat met ’n glas plaaslike wyn of varsgedrukte vrugtesap geniet kan word.
Waar kom jou belangstelling in kos vandaan en waar het jy jou opleiding ondergaan?
My liefde vir kos kom van my ouma af. Al van ’n vroeë ouderdom af het sy my geleer om te bak. Ná skool het ek my liefde vir kosmaak uitgebrei deur aan die Cape College in Kaapstad te studeer.
Hoe maklik is dit om die sjef by ’n nuwe restaurant te wees, veral een wat so mooi is en soveel mediadekking kry?
Van die eerste dag wat ek hier ingestap het, het ek tuis gevoel. Ek en die span by Bosjes deel dieselfde waardes.
Watter tipe styl sal jy sê is die kos by die restaurant?
Ek sal die Bosjes Kombuis se kos as eenvoudig, tog modern en seisoenaal beskryf.
Wat was die mees romantiee maal wat jy nog geniet het – vertel my daarvan?
Beslis ’n kreef, wat ek geniet het saam met Franse sjampanje op ’n seiljag terwyl die son in die agtergrond ondergegaan het.
Wat is jou terugvaldis as jy vinnig iets moet kook?
My gunsteling-kitsdis is beslis ’n kaasomelet. Vinnig om te maak, tog heerlik!
Wat is die een dis wat jou vriende of familie telkemale voor vra en jy oor en oor moet maak?
Ek word gereeld versoek om die sticky Asian pork belly met aartappel en guacamole te maak, wat tans ook op die nuwe somerspyskaart van die Bosjes Kombuis is.
Wat was jou slegste maal ooit, vertel my daarvan?
Die slegste maal wat ek al ooit gehad het, was ’n pizza. Gewoonlik is ek baie lief vir pizza, maar ongelukkig was hierdie spesifieke pizza se basis nog rou en klam. Ek het ook gevoel dat die tamatiesmoor smaakloos was en dat ’n bietjie meer kaas gekort het.
LEES OOK: Sjefs: Henry Vigar
Watter drie bekende mense sou jy vir aandete wou nooi en hoekom?
Ek sal graag om ’n etenstafel wil sit met die volgende bekende sjefs wat ek as ’n inspirasie beskou: Gordon Ramsay, Marco Pierre White en Raymond Blanc.
Watter een bestanddeel kikker vir jou enige maal op?
Vir my kan vars kruie soos basilie en koljander enige maal opkikker, deur ekstra geur te verleen aan die disse.
Wat is jou doodsonde met kos?
Ek vermoed dat roomys my doodsonde is, aangesien ek dit bloot so uit die bak eet en die lepel sommer inlos vir volgende keer.
Wat is jou een geheim vir ’n lekker bredie of sop?
’n Bredie/sop is nie volmaak sonder klappermelk en koljander nie.
Is daar een dis wat jy nie eet nie en ook nie graag berei nie?
Ek is glad nie lief vir afval nie, en sal verkies om dit nie voor te berei nie.
Wat is jou gunstelingwyn en met watter dis drink jy dit graag?
Ek geniet graag ’n glas Spier se 21 Gables pinotage met spaghetti bolognese.
Wat was jou grootste kombuisflater?
Om ’n pot sop op die stoof te vergeet wat ek besig was om voor te berei vir ’n funksie en dit natuurlik toe lelik te verbrand.
Hoe voel jy oor botter en eendvet?
Mal daaroor en ek kan nie daarsonder lewe nie!
Hoe sal jy jou kookstyl beskryf?
Eenvoudig en sonder fieterjasies.
Wat was ’n sjefshoogtepunt vir jou?
Om vir die bekende Amerikaanse sangers, Puff Daddy en Alicia Keys, te kook.
Watter kosreuke herinner jou aan jou kinderdae?
Beslis die reuk van gesmelte kaas en varsgebakte koekies.
Drie bestanddele waarsonder jy nie kan kook nie?
Botter, room en vars kruie.
LEES OOK: Sjef Anna Alberts
Watter kombuisgereedskap het jou lewe verander?
Die Thermomix, omdat dit 12 ander toestelle se funksies in een kan verrig.
Is daar een ding waarteen die meeste mense opsien waarvoor jy ’n kortpad gekry het, soos neute uitdop, iets wat tydrowend is, bv.
Ek het ’n geheime kortpad ontdek vir die vinnige ontbening van pluimvee.
Watter restaurant is tans jou gunsteling?
Ek eet graag by Marigold in Franschhoek.
Wat bestel jy as jy gaan uiteet?
Ek bestel gewoonlik ‘n pizza.
Onthaal jy graag en indien wel, wat maak jy graag vir vriende?
Ek is baie lief daarvoor om mense te onthaal en ’n groot feesmaal voor te berei waar gaste aangemoedig word om hulself te help tot soveel as wat hulle wil. Die spyskaart sluit gewoonlik kerries met sambals en rotis in.
As jy ’n drankie kon wees, wat sou jy wees?
’n Hunters Dry.
Waar is jou gunstelingkosbestemming?
Die Franschhoek-area het verskeie restaurante wat ek graag besoek.
Het jy ’n gunstelingkookboek?
Ja, ek is tans mal oor Jamie Oliver se kookboeke.
As jy nie as ’n sjef gekwalifiseer het nie, watter ander beroep sou jy kon volg?
Ek sou dit geniet het om ’n rekenmeester te wees.
Kim se lamkotelette met taboulleh-slaai met komkommer-raita (genoeg vir 4)
Taboulleh
200 g bulgurkoring (week in water tot sag en dreineer)
100 g komkommer in fyn blokkies gesny
100 g kersietamaties in kwarte gesny
30 ml suurlemoensap
20 ml fyngekapte knoffel
20 g fyngekapte pietersielie
20 g fyngekapte koljander
10 g fyngekapte ment
Meng goed saam en geur met sout en peper na smaak
Komkommer-raita
Halwe komkommer in fyn blokkies gesny
250 ml dubbeldik ongegeurde jogurt
2 g fyngekapte ment
2 g fyngekapte vinkel
5 ml suurlemoensap
Meng goed saam en geur met sout en peper na smaak
Lamkotelette
Marineer 12 lamkotelette vir twee ure in mengsel van grofgekapte knoffel, roosmaryn, suurlemoensap, olyfolie. Braai in ’n pan tot goudbruin buite, maar effe pienk binne. Bedien met die raita en taboulleh-slaai.
