Afrikaanse veldtog bekendgestel

Daar was gisteraand in Johannesburg, ‘n bewusmakingsveldtog bekendgestel vir Afrikaanssprekendes om hul taal te vier. Die veldtog wil Afrikaans as ‘n handelsmerk bevorder. Hulle het ook hul nuwe webwerf bekendgestel: Afrikaans.com. Die werberf en veldtog word deur die Dagbreek Trust gefinansier.

Afrikaans.com beskryf hulself:

“In ons land verteenwoordig Afrikaans baie verskillende kulture, dialekte en variante.
Afrikaans is divers, kleurvol en kontemporêr. Afrikaans is ‘n taal waarvoor ons lief is en waarop ons trots is, want uiteindelik behoort Afrikaans aan elkeen van ons, selfs diegene wat dalk nie elke dag Afrikaans praat nie.

Met Veldtog Afrikaans fokus ons op hierdie diversiteit, op waardes, skoonheid en genot.
Deurgaans word die positiewe gevier, verken en gedeel. Om die taal dieper te laat inkruip in die harte van diegene wat dit gereeld gebruik, maar ook om diegene wat dit minder gereeld gebruik met ander oë daarna te laat kyk.

Veldtog Afrikaans se boodskappe word vir al die platforms aangepas sodat diversiteit integraal deel is, nie net van die veldtogboodskap nie, maar ook in die lewering daarvan.
Sodat dit tot vele kan spreek.

Ons rig met die veldtog die uitnodiging: Vertel ons hoe lyk jou Afrikaans.
Deel jou Afrikaanse leefwêreld met ons sodat ons die kleurrykheid daarvan kan sien … dit saam met jou kan geniet.”