Oorskiet-katoendubbeldraad in kleure van

jou keuse asook groen vir die stammetjies

3,5 mm-hekelpen

Naald om drade mee weg te werk

Sosatiestokkies

Gomgeweer en gomstafies

Snoeiskêr of handsagie

Knopies of pêrels (opsioneel)

Afkortings

dr – draai; dsl – dubbelslagsteek; h/af – heg af; herh – herhaal; hlb – halflangbeen; kb – kortbeen; ks – kettingsteek; lb – langbeen; st – steek; vlg – volgende

Aanwysings: Roos

Met 3,5 mm-pen en dubbelbreidraad, hekel 131 ks.
1ste ry: 1 kb in 2de ks vanaf pen en in vlg 21 ks, 1 hlb in vlg 32 ks, 1 lb in vlg 44 ks, 1 dsl in vlg 32 ks, dr.
2de ry: 2 ks, slaan 1 st oor, *6 lb in vlg st, slaan 1 st oor, 1 kb in vlg st, slaan 1 st oor, herh van * tot einde. H/af.
1 Werk die los drade weg. Begin by die smal punt en rol die strook geleidelik op om ’n rosie te vorm. Werk wendings aan die onderkant vas soos jy die strook oprol.
2 Werk ’n knopie of pêrel in die kern van die rosie vas indien verkies.

Stammetjie

Met 3,5 mm-pen en groen dubbelbreidraad, hekel 50 ks.
1ste ry: 1 kb in 2de ks vanaf pen en in elke ks tot einde, dr.
2de–4de ry: 1 ks, 1 kb in elke kb tot einde, dr.
1 Werk los drade weg. Vou die gehekelde strook om die sosatiestokkie en werk met oorhandstekies vas.
2 Knip of saag die skerp punt van die stokkie met die snoeiskêr of handsagie af.
3 Gom die punt van die stokkie aan die onderkant van die roos vas en laat afkoel.
4 Hekel nou ’n hele klomp rose wat jy nie eers water hoef te gee nie!