Neut-en-saad-beskuit

Daar is min dinge so lekker in die oggend soos ’n koppie koffie met ’n beskuit! Maak die lekker neut-en-saad-beskuit

ongeveer 48 stukke

Bestanddele

1 kg (8 k) bruismeel
15 ml (1 e) bakpoeier
5 ml (1 t) sout
350 g koue botter
1 00 g (1 pakkie) pekanneute, grofgekap
750 ml (3 k) All-Bran
60 ml (4 e) papawersaad
125 ml (½ k) lynsaad
125 ml (½ k) sonneblomsaad
60 ml (4 e) pampoensaad
375 ml (1½ k) suiker
250 ml (1 k) semels
250 ml (1 k) sultanas
125 ml (½ k) rosyntjies
3 ekstragroot eiers
750 ml (3 k) karringmelk
125 ml (½ k) olie

Metode

Stel oond op 180 °C.

1. Meng bruismeel, bakpoeier en sout saam.
2. Rasper botter by meelmengsel. Vryf botter verder met vingers in totdat mengsel soos broodkrummels lyk.
3. Roer neute, All-Bran, papawersaad, lynsaad, sonneblomsaad, pampoensaad, suiker, semels, sultanas en rosyntjies by meelmengsel.
4. Klits eiers. Voeg karringmelk en olie by en klits weer tot gemeng.
5. Voeg eiermengsel by meelmengsel en meng tot deeg.
6. Smeer oondpan van 26 cm x 38 cm met botter en voer met bakpapier uit. Smeer weer met botter of spuit met kossproei.
7. Bak vir 45 minute of tot toetspen skoon uitkom. Laat bietjie afkoel en keer op afkoelrakkie uit om heeltemal af te koel.
8. Sny of breek beskuit in stukke en plaas op bakplate.
9. Droog beskuit teen 70 °C vir 6 tot 7 uur uit.
10. Laat beskuit heeltemal afkoel en pak in beskuitblikke.