Geld & geluk

Ons almal ken die gesegde: Geld kan nie geluk koop nie. Maar ek moet met Leo Rosten saamstem wat byvoeg: Armoede ook nie.

Kom ons wees eerlik – geld maak ’n mens se lewe gemakliker, tensy jy ’n moeder Teresa of ’n Gandhi is en sielsgelukkig is met net die een jurk op jou naam en om snags salig op die barre grond te slaap. Ek wil meer jurkies hê. En dit sal lekker wees om nie soos die meeste van ons snags rond te rol, omdat als meer kos en geld nie meer word nie.

Of soos Shanda Luyt in die artikel “Word geld se baas” op bl 10 skryf: “[Soms] voel jy lus om die kombers oor jou kop te trek en net nie verder daaroor te dink nie.” Maar ek hét ’n kombers om oor my kop te trek. Ek hét ’n bed om in te slaap. En elke oggend as ek voor werk in die stort onder helende skoon, warm, lopende water staan en by die venster op my eie huisie se tuintjie uitkyk, besef ek hoe gelukkig ek is. Dit wat ek as vanselfsprekend aanvaar, is vir baie mense bloot ’n onvervulbare (selfs onvoorstelbare) droom.

Oor geld is al derduisende boeke geskryf, wat baie mense al baie ryk gemaak het. Die vraag is: Kan ’n mens ooit te veel geld hê? Ek dink so. Daar is ’n verskil tussen gemaklik leef en gulsig leef en ek het al te veel kere gesien dat mense wat in die gulsige kategorie val, hul menslikheid en menswees prysgee. Dis soos Will Smith sê: “Geld en sukses verander nie mense nie; dit beklemtoon net dit wat nog altyd daar was.” Maak nie saak hoeveel geld ’n mens het nie, dis dalk goed om in gedagte te hou … … geld kan ’n huis koop, maar nie ’n tuiste nie. Dit kan ’n horlosie koop, maar nie tyd nie. Dit kan ’n posisie koop, maar nie respek nie. Dis Art Buchwald wat gesê het: “Die beste goed in die lewe is nie goeters nie.”