Ek dink die kuns om beskaafd te kommunikeer, is nie noodwendig wat jy sê nie, maar die manier waarop jy dit sê
Ons ken almal die uitdrukking “sit ’n wag voor jou mond” en letterlik geïnterpreteer is dit nie onsinnige raad nie. Gemuilband of gesensureer wil ons ook nie deur die lewe gaan nie, maar ons almal het al iets kwytgeraak wat eerder kon gebly het.
Kwetsende, vernynige, afbrekende of beledigende woorde wat jy iemand toesnou, sê inderdaad meer oor jouself as oor die ander persoon. Dit gesê, daar is mense wat só droogmaak dat ’n paar reguit, ferm woorde inderdaad nodig is. Ek dink die kuns om beskaafd te kommunikeer, is nie noodwendig wat jy sê nie, maar die manier waarop jy dit sê. Tel tot tien voor jy reageer, is nog ’n gesegde wat ’n stemmetjie in jou kop moet wees, veral as jy in die openbaar iets kwytraak.
’n Amerikaanse senator, Maureen Walsh, het ’n paar weke gelede in die openbaar in haar werksomgewing gesê dat verpleegsters waarskynlik groot dele van die dag sit en kaartspeel. Dis ’n sprekende voorbeeld van praat voor jy dink. Die reaksie op haar uitlating was onder meer: 27 000 oproepe na haar kantoor en ’n petisie, deur 770 000 mense onderteken, wat eis dat sy saam met ’n verpleegster op ’n 12-uur-skof werk. Walsh het kort ná haar uitlating openlik erken dat sy wens sy kon haar woorde letterlik terugtrek.
Ongelukkig is daar nie ’n delete-knoppie om dit te doen nie. As jy iets gesê het, het jy dit gesê. Uiteraard kan mens verskoning vra en erken dat wat jy gesê het, onwaar, onnodig of oningelig was. Dis dan wat Walsh ook gedoen het: “I want to offer my heartfelt apologies to those I offended with my comments on the Senate floor last Tuesday. I was tired, and in the heat of argument on the Senate floor, I said some things about nurses that were taken out of context – but still they crossed the line.”
Voor hierdie voorval het ek nie ’n idee gehad wie ene Maureen Walsh in Amerika is nie. Nou weet ek en die rede daaroor is nie vleiend nie. Haar naam roep nie by my ’n beeld op van ’n gawe, empatiese, liefdevolle, intelligente, volwasse mens nie (wat sy dalk is). Die mense en geliefdes ná aan Walsh ken waarskynlik ’n ander kant van haar en besef dat sy in die hitte van die oomblik iets kwytgeraak het. Niemand is dood nie en wat sy gesê het, is nie die begin van die Derde Wêreldoorlog nie, maar dis iets waaroor sy vir die res van haar lewe verleë gaan wees. As jy iets sê wat gesê moet word, sê dit, maar onthou:
Voor jy ’n afleiding maak, maak seker van jou feite. Voor jy oordeel, probeer verstaan hoekom. Voor jy iemand seermaak, voel. Voor jy iets doen, dink. Voor jy iets sê, dink twee keer.
Een van die beste aanhalings oor hierdie tema wat ek al gelees het, is:
Think before you speak, because your reputation is linked to your words.
Eldaleen is die redakteur van Vrouekeur.
