Kuns: All Too Human

“All Too Human” fokus op rou ervarings wat in verf gestalte kry

Deur JOHAN MYBURG

Tate Britain bied tans ’n uitstalling aan wat allerweë as ’n besonderse mylpaal vir dié Londense kunsmuseum beskryf word. All Too Human: Bacon, Freud and a Century of Painting Life bring die werk van Britse skilders byeen wat in hul werk op intieme manier op menslike figure, hul verhoudings en omgewings gefokus het.

Benewens die werk van Lucian Freud (1922–2011) en Francis Bacon (1909–1992) is seldsame werk van hul tydgenote in die versameling van sowat 100 skilderye ingesluit – tydgenote soos Frank Auerbach (1931) en Paula Rego (1935). Die kurators het in die samestelling op die rou ervarings gefokus wat in verf gestalte kry. Dit was immers Freud (die kleinseun van Sigmund Freud) wat gesê het: “Ek wil hê die verf moet werk op die manier waarop vel en vleis dit doen.” Dié oogmerk het Alex Farquharson, direkteur van Tate Britain, onderstreep met dié woorde: “Dié uitstalling dui aan hoe Britse figuratiewe skilders met nuwe en kragtige maniere vorendag gekom het om regdeur die 20ste eeu lewe op doek vas te lê. En Bacon se portrette is van die beste voorbeelde hiervan.”

Verskeie belangrike skilderye van Bacon word vir die eerste keer in soveel as drie dekades in Brittanje vertoon. Een daarvan is ’n tamaai portret van Freud, ’n goeie vriend van Bacon. Die skildery is in 1964 voltooi en dieselfde jaar in Londen en die volgende jaar in Hamburg en Stockholm uitgestal. Daarna het dit in private besit gekom en was vir meer as 50 jaar uit die openbare oog. Bacon en Freud het ’n onstuimige vriendskap gehad. Hulle is dikwels in die kunswêreld as teenstanders gereken, maar die twee kon telkens daarin slaag om mekaar die hand van vriendskap te reik. Totdat ’n argument die verhouding in die middel-1970’s finaal tot ’n einde gebring het.

LEES OOK: Kuns: Auguste Rodin

Voor dié uitval het hulle soms die een vir die ander vir ’n portret geposeer. Freud het verkies om modelle te gebruik en hulle direk te skilder terwyl Bacon foto’s as vertrekpunt verkies het, dikwels die foto’s van die fotograaf John Deakin. In 1969 het Bacon ’n triptiek, Three Studies of Lucian Freud, geskilder – wat in 2013 die skildery geword het wat in daardie stadium die duurste ter wêreld was. Op ’n veiling van Christie’s in New York is dié drieluik vir sowat R1,5 miljard verkoop. Study for Portrait of Lucian Freud, 1964, staan net meer as 2 m hoog en is die portret van ’n figuur met angs deurtrek.

Hy het ´n kaal bolyf en is as ’t ware in ’n donker hoek geslinger. Bokant die figuur is ’n enkele naakte gloeilamp. Die uitstalling se titel is ontleen aan ’n drieluik wat Bacon in 1975–’77 van George Dyer geskilder het, dié van ’n verwronge lyf onder ’n swart sambreel op ’n koue strand. Ook dié werk is in ’n private versameling opgeneem en is 30 jaar nooit in die openbaar vertoon nie. All Too Human: Bacon, Freud and a Century of Painting Life is tot 27 Augustus in die Tate Britain te sien. Skilders wie se werk in dié uitstalling ingesluit is, strek van Walter Sickert en Stanley Spencer tot Frank Auerbach, RB Kitaj en Leon Kossoff, en ook Paula Rego en Jenny Saville. Die kurators is Elena Crippa, Tate se kurator vir moderne en kontemporêre Britse kuns, en Laura Castagnini, assistent-kurator.