Michélle Theron is onlangs as Hazendal Wynlandgoed buite Stellenbosch se hoofsjef aangestel
Deur MARYKE ROBERTS
Foto’s verskaf
Die landgoed se restaurant het vroeg verlede jaar toegemaak vir ’n algehele opknapping om weer in Desember vir besoekers ‘n dinamiese, ‘anderse’ Wynland-ervaring te bied wat, onder andere, Russiese tradisies met die Suid-Afrikaanse kultuur kombineer.
Michélle was redelik jonk toe sy haar loopbaan afgeskop het. Kookkuns en -literatuur het haar reeds as kind gefassineer. Dít het haar deeglikheid en uitstekende uitvoerings in die kombuis geïnspireer. Sy het ook graag die werk van haar gunsteling- internasionale koskundiges dopgehou wat haar net nuuskieriger gemaak en aangespoor het om haar drome na te streef. Vandag is Michélle ’n gerespekteerde sjef in die Suid-Afrikaanse kosbedryf.
Nadat sy haar studies by Boland Kollege in Stellenbosch voltooi het, het Michélle by voorste restaurante aan die Kaapse waterfront en Wynlande aangesluit. Sy was ook deel van die span wat ‘n toptien-posisie in die 2013 Eat Out DStv Food Network Restaurant-toekennings losgeslaan het. Benewens laasgenoemde, het Michélle se tyd by Michelin-restaurante (Europa) en ander oorsese kombuise haar koskennis bevorder en in staat gestel om tradisionele geure met moderne giere te kombineer.
Hoe lyk jou resepteboekversameling: plakboek met los blaaie, of netjies georden?
Ek is baie heilig op my boeke, wat netjies georden op my boekrakke moet wees. My notaboeke, waarin al my eie resepte is, lyk maar woes … notas en kosmerke net waar jy kyk!
Hoeveel resepteboeke het jy en watter een is jou gunsteling?
Ek sal moet tel, maar ek skat om en by 40. My heel gunstelingboek is The Flavor Thesaurus Pairings, recipes and ideas for the creative cook.
Wie het jou belangstelling in kosmaak wakker gemaak?
Kook en kuier in die kombuis was hoe ek grootgeword het. Ek het geweet dat as ek dit vir ’n lewe kon doen, sou dit wonderlik wees. Ek geniet mense. Die kreatiwiteit wat met kosvoorsit gepaardgaan, is vir my baie spesiaal.
Watter vyf bestanddele is altyd in jou spens?
Sout, olyfolie, truffel-olie, risotto-rys en grondboontjiebotter.
Wat is die gereg wat jy maak as jy vinnig iets moet berei?
Risotto en enige vars pasta.
Watter een bestanddeel kikker vir jou enige maal op?
Suurlemoen. Dit is ´n natuurlike manier om geure op te kikker.
Wat is jou gunstelingwyn en met watter dis drink jy dit graag?
Hazendal Semillon Sauvignon Blanc is ongelooflik. Dit gaan mooi saam met mossels in romerige witwynsous of spanspek en salami.
Watter kosreuke herinner jou aan jou kinderdae en watter resep het jou ouma gemaak wat jou hart gesteel het?
Pannekoek met kaneelsuiker.
Waarvoor sal jy jou siel verkoop?
Enigiets met sjokolade ….
Drie bestanddele waarsonder jy nie kan kook nie?
Sout, goeie olyfolie en vars kruie.
Wat bestel jy as jy gaan uiteet?
Ek is mal oor tapas-styl eet.
Wat eet en berei jy nie?
Ek sal enigiets voorberei, maar eet geensins appelliefies nie.
Watter is jou gunstelingkrui en het jy ’n kruietuin?
Roosmaryn, tiemie en salie. Ja ek het.
Wat eet jy skelm uit die potjie/bak?
Alles!
Na watter sjef kyk jy op?
Margot Janse
Watter land of stad se kosmarkte geniet jy die meeste?
Barcelona
Michélle se pistasieneutbeskuit met witsjokolade en gedroogde vrugte
(Ongeveer 24 blokkies)
Bestanddele:
1 e ongesoute botter, gesmelt
3 e kanola-olie 1 groot eier, kamertemperatuur
2 t vanieljegeursel
Gerasperde skil van 1 lemoen
½ k suiker
1¾ e koekmeel vir bak en 1 e koekmeel om die bakplaat te bedek
1 t bakpoeier
½ t sout
¾ k pistasieneute, gerooster en gekap
½ k witsjokolade-skyfies
⅓ k gedroogde rooibessies
½ k gedroogde, ontpitte dadels, fyngesny
1 groot eier, geklits met 1 e water (om die beskuit mee te bedek vóór dit gebak word)
Metode
Verhit die oond tot 180˚C.
- Bedek ’n bakplaat met bakpapier. Hou eenkant.
- Klits die botter, olie, eiers, vanieljegeursel, gerasperde lemoenskil en suiker saam. Hou eenkant.
- Meng die meel, bakpoeier, sout, neute, sjokoladeskyfies, bessies en dadels saam.
- Voeg die nat bestanddele by en meng geleidelik tot alles gekombineer is.
- Rol die deeg uit op ’n bakplaat wat met meel bedek is. Rol die deeg sagkens uit om ’n reghoek van ongeveer 15 cm x 18 cm te vorm.
- Gebruik ’n kwas om die deeg met die eier-en-water-mengsel te smeer.
- Bak vir ongeveer 20 – 25 min tot die deeg ligbruin word.
- Haal die gebak uit die oond en plaas op ’n koelrak vir ongeveer 10 min.
- Verdeel die beskuit in 1 cm- tot 2 cm-blokkies en plaas terug in die oond.
- Bak vir nog ongeveer 9 min aan elke kant.
Die beskuit sal kraakvars vertoon sodra dit afgekoel het. Stoor in ’n lugdigte houer tot twee weke
