Christine Capendale is ’n kosliefhebber en deel graag haar voorliefdes en geheime
Deur MARYKE ROBERTS
Foto’s Myburgh du Plessis
Christine is ’n opgeleide sjef en het lang jare gewilde kookklasse in Langebaan gegee, waar sy die beste van die Weskus se uitsonderlike produkte gemaak het en haar kennis wyd gedeel het.
In Maaltye – maklike geregte vir elke dag, wat pas by Human & Rousseau verskyn het, kry jy slim oplossings vir middagetes, aandetes en onthaalmaaltye. Jou familie en vriende sal weer en weer vra daarvoor. Christine Capendale het verleidelike geregte geskep wat nogtans maklik is om te maak, gesond is en jou nie ure lank in die kombuis besig sal hou nie.
Haar kosfilosofie is dat ons almal elke dag heerlik kan eet, en dat die roetine van kosmaak ons nie noodwendig in ’n groef hoef te laat nie: ons kan avontuurlustig kosmaak sonder om ure in die kombuis deur te bring of eksotiese en duur bestanddele te gebruik.
Sy woon deesdae in Kaapstad en Pretoria, waar sy steeds haar liefde vir kos uitleef met kosklasse en skryf oor kook. Sy het pas ’n kos-ateljee in haar huis laat inrig.
Hoe voel dit om jou eie kookboek in jou hande te hou?
WONDERLIK en ook effe nervous! Mens wonder maar altyd of daar nie iets is wat mens nog beter of anders kon gedoen het nie.
Waar het jy jou opleiding ondergaan?
BSc huishoudkunde en Dieetkunde by Stellenbosch Universiteit.
Wat het jou belangstelling in kos wakkergemaak?
My ma het my van kleins af in die kombuis laat help – sy het my met baie geduld aangemoedig en ek het ure saam met haar daar deurgebring.
Is daar een resep in hierdie kookboek wat jy sou bestempel as die gunsteling van alle gunstelinge?
Die Indiese botterhoender. Ek sal dit elke dag kan eet.
Waar kom die resepte vandaan – ouma, ma, vriende, self?
Sommer van oral en ek is maar heeltyd besig om te dink oor kos en resepte. Ek eksperimenteer ook baie en soek oral inspirasie. Ek hou daarvan om geregte eenvoudiger te maak en sal baiemaal iets sien (of proe) waarvan ek baie hou – en dit dan my eie kinkel gee.
Wat was die mees romantiese maal wat jy nog geniet het?
My man reël elke jaar vir ons iets baie spesiaals vir ons huweliksherdenking – dit sluit altyd ’n romantiese ete in. Die beste een was in Greyton waar ons op wittebrood was, baie jare gelede.
Wat was jou slegste maal ooit?
Dit was onlangs by ’n nuwe fynproewersrestaurant in die Kaap. Party sjefs probeer regtig te hard om “anders” te wees. Die smake het glad nie gewerk nie en die kos was sleg. Selfs die nagereg was nie lekker nie. Baie van die kos is ook rou bedien.
Hoe het jou eerste kookklas ontstaan en vertel my meer van jou kos-ateljee en kookklasse in Kaapstad?
My eerste kookklasse was in Langebaan. Dit het maar begin met vriende wat my aangemoedig het. Paar jaar later het ek my eie kookstudio gehad. Dit was baie gewild. Tans doen ek soms kookklasse vanaf my huis in die Kaap – die plan is om dit in die toekoms meer gereeld te doen.
Watter bekende sal jy graag wil nooi vir aandete en hoekom?
Vir Ottolenghi; hy is my kos-ghoeroe. Ek is mal oor sy vars, ongekompliseerde kos en sy resepte werk altyd 100%.
Wat sal jy kook?
Sjoe, ek dink ek sal vir hom lekker Suid-Afrikaanse kos maak; maar beslis met ’n kinkel.
Watter een bestandeel kikker vir jou enige maal op?
Suurlemoene
Wat is jou een geheim vir ’n lekker winterdis wat sommer die dis oemf gee?
Vars kruie. Dit werk so goed met sop en bredies – dit laat dit na somer smaak.
Wat was jou grootste kombuisflater?
Ek en my jarelange vriendin en vennoot het ons datums verkeerd gehad vir ’n 90ste verjaarsdag-ete. Ons het so 2 ure voor die gaste opdaag, ons fout ontdek en kon gelukkig darem iets te ete uitkry vir die groep van 60. Dit was beslis een van die stresvolste dae wat ek ooit in ’n kombuis deurgebring het. Gelukkig het als darem lekker geproe en almal was doodgelukkig.
Waarvoor sal jy jou siel verkoop?
’n Capreseslaai met ’n goeie burrata en baie vars basilie.
Drie bestanddele waarsonder jy nie kan kook nie?
Knoffel, vars kruie en suurlemoen.
Watter kombuisgereedskap het jou lewe verander?
My Kenwood Chef. My eerste een is al 35 jaar oud en hy werk nog steeds wonderlik.
Hou jy daarvan as gaste kom, dat hulle ’n slaai of nagereg bring, of kook jy alleen?
Ek verkies om my gaste baie te bederf. Hulle kan net kom en hulself geniet – daar word ook nooit van gaste verwag om op te ruim nie.
As jy ’n drankie kon wees, wat sou jy wees?
Beslis ’n Pimms met baie vars vrugte, lemmetjie en vars basilie.
Hoe lyk jou kookboek-versameling en hoe orden jy jou jou resepte?
Ek het SO baie kookboeke. Ek kan dit net nie weerstaan nie en koop gereeld nuwes. Die huis is maar vol hopies kookboeke op verskeie plekke. Altyd ’n klomp langs my bed – ek lees (of blaai ) maar altyd deur ’n kookboek voor ek gaan slaap. My gunsteling-resepte sit ek altyd op my rekenaar in ’n speiale lêer.
Het jy ’n gunstelingkookboek?
Ja, die eerste Ottolenghi-kookboek, The Cookbook. Die resepte is uitstekend. Dis ook redelik tydloos.
Wie het jou al jou beste raad gegee?
My man. Ek het só baie respek vir hom. Hy het vir my gesê: “Gee die beste van jouself vir die persone vir wie jy die liefste is”. Ek doen dit elke dag en dit is beslis die beste resep vir geluk, dink ek.
Maalvleis-en-mielie-herderspastei
(4 porsies)
Bestanddele
15 ml olie
2 uie, gekap
600 g ekstra-maer beesmaalvleis
10 ml komynsaad
5 ml fyn koljander
2,5 ml brandrissievlokkies of gekapte vars brandrissie na smaak
5 ml paprika
sout en varsgemaalde swartpeper
100 ml ontpitte, gekapte groen olywe
50 ml gekapte vars pietersielie
60 ml gekapte pikantrissies (peppadews)
50 ml tamatiesous
30 ml Worcestershiresous
1 blik (400 g) heelpitmielies, gedreineer
125 g crème fraîche
2 eiers
15 ml gekapte vars basiliekruid
ekstra basiliekruid om voor te sit
Metode
Voorverhit die oond tot 180 °C. Verhit die olie in ’n diep, oondvaste braaipan oor matige hitte en braai die uie tot bruin. Stel die hitte hoër en voeg die maalvleis by. Roer met ’n vurk om die vleis op te breek en voeg dan die komynsaad, koljander, brandrissie en paprika by. Geur met sout en peper en braai totdat daar geen vloeistof in die braaipan oor is nie.
Verlaag die hitte en roer die olywe, pietersielie, pikantrissies, tamatiesous en Worcestershiresous by. Meng goed, verwyder van die hitte en geur na smaak. Pols die heelpitmielies, crème fraîche, eiers en sout en swartpeper vinnig saam in ’n voedselverwerker – die mengsel moet ’n growwe tekstuur hê. Roer die gekapte basiliekruid by en giet die mengsel oor die maalvleis in die braaipan.
Bak vir sowat 30 minute tot geset en goudbruin. Strooi vars basiliekruid oor en sit voor saam met ’n slaai.
Het jy geweet?
’n Herderspastei is basies ’n stowegereg wat bestaan uit groente en vleis bedek met kapokaartappels, wat in die oond gebak word. Hierdie variasie het ’n mielie-bolaag en is geïnspireer deur ’n Suid-Amerikaanse gereg, pastel de choclo, wat mielietert beteken.
