Annelien Pienaar, ’n voedselwetenskaplike, en haar man, Hanru, is pekanneutboere en eienaars van die gasteplaas Bos-en-Berg by Skeerpoort (naby Hartbeespoort)
Deur Maryke Roberts
Foto’s verskaf
Hier bedryf sy haar kookskool en haar trefferblog, BoereKosTwist. Haar boek, Boerekos met ‘n twist, het pas by Human & Rousseau verskyn.
In die boek gee sy ’n kwyllekker kinkel aan die eenvoudige, voedsame huiskos wat jou ma, ouma en oumagrootjie gemaak het. Dié 140 familieresepte vir soppe, souse, groente-, vleis- en nageregte én gebak en spenstreffers is getoets, bevat g’n vreemde bestanddele nie en sit die “resep-met-’n-les”-konsep voort wat haar gelyknamige blog en Facebookblad so ‘n sosialemediasukses maak. Boerekos met ’n twist kan beskryf word as ‘n kompakte 21ste-eeuse Kook en Geniet vir besige mense.
Waar kom jou belangstelling in kook vandaan en wanneer het jy besluit om ’n blog te begin?
My moeder en ouma Bezuidenhout was huishoudkundiges en nadat jongste sus met insulien afhanklike diabetes gediagnoseer was, het ek my studieveld gekies. Die blog het begin omdat ek lui was om eposse te hanteer. Ek het op FB die BKT groep gestig en daar inligting sentraal gedeel, maar toe besef die plasings raak weg en beweeg toe na ’n blog-stelsel. Die blog het binne 18 maande 2,4 miljoen besoeke gekry en ek het toe oorgeskuif na ’n formele webtuiste, met meer funksies en wat ook meer gebruikersvriendelik is.
Wat was die romantiese maal wat jy nog geniet het?
My man het vir my gekook toe ons verloof geraak het, en vir my tot my grootste ergernis kos in die potte direk op die tafel bedien. Toe hy die een pot aanstuur vir my om te skep, was my ring daarin met die boodskap: “Elke pot kry sy deksel.” Die ete was doodgewone kookkos met pampoen, boontjies, rys en skaap.
Wat is jou terugval dis as jy vinnig iets moet kook?
Pasta met ’n tamatiesousbasis. Ek het altyd tamatiesmoor met basiliekruid op die rak. Jy kook die pasta, maak die sous warm en voila! 15 min en ons eet. Die kinders besluit of hulle maalvleis wil by hê of nie.
Wat was jou slegste maal ooit?
Kom ons sê eerder, die teleurstellendste maal van my lewe. Wanneer jy hoor van ’n plek met die ongelooflikste spyskaart en wonderlike sjef. Ek is nie iemand wat maklik uiteet nie, maar as ek gaan, sien jy uit na die bederf. Jy bestel die beste dis wat jy weet uiters tegnies is om te berei en dan is dit absoluut nie wat dit moet wees. Soos in die geval van osstert. Drie, taai bene in ’n bakkie vir R180. Die kool die sous nie werd nie. Vir ’n hoofmaal moet jou kliënte voel, hul is nie rasend honger na die gang nie.
Watter drie bekendes sal jy nooi vir aandete?
Gordon Ramsay, want sy tegniese kennis van kombuisbestuur, spyskaartbeplanning, die maak en ontwikkel van disse is ongelooflik en dit sal ’n wonderlike intelligente gesprek wees. Ek is net so prontuit soos hy en draai nie doekies om as dit by my werk kom nie.
LEES OOK: Sjefs: Henry Vigar
Chris Cameleon, want hy is ’n interessante karakter en fasineer my vandat ek jare gelede sy gesig op TV gesien het jare gelede.
Barbara Streisand, want sy is ook ’n ongelooflike kunstenaar. Haar diep kyk en kennis is iets wat my vir jare al aantrek. Sy laat my dink aan ’n luiperd, stil en sku, maar tog is haar teenwoordigheid daar, want sy is besig agter die skerms.
Wat sal op die spyskaart wees?
Definitief my kultuur se boerekos. Dit sal ’n lang tafel wees met kuierkos vir ten minste 6 ure se kuier…skep en eet…tapasstyl. Die geleentheid moet gesellig wees buite in my boord, waar ons net kan sit en praat oor die lewe en ons passies.
Watter een bestanddeel kikker vir jou enige maal op?
Ek hou van geure en kleure in my kos…dus sal ek knoffel en fennegriek kies want in kombinasie is dit ongelooflik en word een.
Wat is jou doodsonde met kos?
Ek het altyd ’n 80% Lindt-sjokolade in my lessenaarlaai. Laat nag kan ek nie die versoeking weerstaan om dit te smelt en dan malvalekkers daarmee te meng en saam met ’n koppie Earl Grey te geniet nie.
Is daar een dis wat jy nie eet nie en ook nie graag berei nie?
Ek is allergies vir skulpvis en is gaande oor vis. Ek het ongelukkig al probleme by restaurante opgetel met onhigiëniese praktyke en nou eet ek min vis. As ek wel by die kus kom, is dit die eerste ding wat ek koop, vars vis wat ek self bewerk.
Wat was jou grootste kombuisflater?
Ek het nie een nie, want daar is so baie. Reël een, moenie nuwe projekte kook as jy moeg of siek is nie; konsentrasie is alles.
Watter wyn geniet jy om mee te kook en te drink?
Ek geniet Lanzerac se Chardonnay vir soppe soos ’n seekos chowder en bobotie. Om te drink, definitief Merlot of Shiraz.
Hoe sal jy jou kookstyl beskryf?
My opleiding was in Franse kookkuns en die tegniese aspekte kom altyd sterk deur. Dus, my basis is Frans met my kinkel vir die boerekos. Ek is passievol oor boerekos en as jy ooit die boek Die Geskiedenis van Boerekos deur professor Hettie Klaase van Namibië sal kan lees, sal jy verstaan waarom ek hou van boerekos. Dit gee die geskiednis van die eerste persoon wat voet aanwal gesit het in SA. Dus is my kultuur se kos ’n sameflansing van Portugees, Nederlands, Khoisan, Engels, Duits, Italiaans, Frans, Zulu, Xhosa, en vele meer. Dink aan Putu pap van die Zoeloes, Chaklaka van die Noord-Sothos, pannekoek van die Nederlanders, en so gaan die lysie aan. Ons kos is ’n multikultirele sameflansing.
Watter kosreuke herinner jou aan jou kinderdae?
Kaneel en roosmaryn.
Waarvoor sal jy jou siel verkoop?
Tuisgemaakte fudge.
As jy een maal moet uitsonder wat vir jou uitstaan oor die jare, watter een sal dit wees?
My troue se kos. My ma het dit berei en die mense het nog vir jare daarna daaroor gepraat.
LEES OOK: Sjefs: Martjie Malan
Drie bestanddele waarsonder jy nie kan kook nie?
Knoffel, masala (wat ek self maak), goeie kwaliteit steengemaalde koringmeel.
Watter kombuisgereedskap het jou lewe verander?
Glo dit of nie, ek het eers toe ek in my laat 30’s was ‘n staanmenger aangeskaf. Kan nie my lewe sonder dit indink nie. Ek bak baie! Dan is my Prutpot of te wel Slowcooker die volgende wonder van kook. Spaar tyd en geen kos wat brand. Kos is gaar as jy tuiskom.
Is daar een ding waarteen meeste mense opsien waarvoor jy ’n kortpad gekry het – neute uitdop, iets wat tydrowend is?
Ek het my eie kraker ontwerp vir pekans en die instrument word nou onder die pekanboere verkoop. Verder is ’n roomyslepel met die drukmeganisme die volgende wonder – ek het 6 groottes. Een vir klein koekies vorm, een vir maalvleis en frikkadelle en die ander vir koekbeslag om kolwyntjies presies af te meet. Ek is ’n pyn met eenvormigheid.
Watter terugvoer kry jy van jou blog-lesers?
2.4 besoeke op blog sê alles. Hulle voel tuis by die BKT huis en ons het nie moleste nie. Hulle hou van die resep met ’n les beginsel en daarom verkoop die BKT kookboek ongelooflik goed.
Onthaal jy graag en indien wel, wat maak jy graag vir vriende?
Meeste van die tyd word daar by ons gebraai. Dit is egter nie die gewone braai nie. Ons maak Marokkaanse gevlekte lamsboud met heerlike roosmaryn en karringmelkmarinade…bykosse is iets soos couscous en botterskorsieslaai bedien met Roti’s om die vleis in toe te vou.
As jy ’n drankie kon wees, wat sou jy wees?
Konjak, want dit is uiters veelsydig in sy aanwending.
Waar is jou gunsteling kosbestemming?
Turkye en Italië.
Het jy ’n gunsteling kookboek?
Art of Cooking van Carolie de Koster vir ’n Suid-Afrikaanse skrywer. Internasionale boek: Larousse Gastronomique want uit beide kan jy iets leer.
Watter raad het jy aan tuiskokke wat soms oorweldig voel deur onthaal?
Begin by jou begroting. Besluit dan volgens die begroting hoeveel geregte op die spyskaart gaan wees. Hou faktore soos seisoen, tyd van die dag en ook tipe onthaal ingedagte. Wees prakties en dink aan hoe uitvoerbaar die resepte gaan wees ten opsigte van tydsindeling, sodat jou oond nie die hoof gaarmaakmetode gaan wees nie. Kyk wat kan al ’n dag voor die tyd gemaak word – byvoorbeeld nagereg of voorgereg. Hoofgeregte moet altyd op die dag gemaak word sodat dit vars is. Veral met vleis kan dit nie ’n dag voor die tyd gaar gemaak word nie.
Wie is jou koshelde?
Ek dink elke liewe leser en volger van BKT is my helde en heldinne, want as ek soms sien hoe baie hulle kom spog met die resepte van die webtuiste wat hul gemaak het, bars ek van trots.
Watter is jou gunsteling krui?
Roosmaryn en vars koljander.
Wat is die mooiste woorde wat jy al om kos gehoor het?
Ek sal dit eerder geluide noem – die gesigte en die uitdrukkings as mense die eerste happie van my geregte neem. Daar is eers ’n stilte, dan sluk, deur die neus uitasem en dan voila…mhhhh…wow…en dan vra hul na meer! My geure is fyn uitgewerk, soos ’n wynmaker sy wyn sal ontwikkel vir spesefieke einskappe…so is my kos ook.
Annelien Pienaar se resep vir dadelblokkies (lewer 40 blokkies):
Bestanddele
Ekstrafyn klapper
500 g botter
1 kg versiersuiker
500 g gekapte dadels
60 ml kakao
2,5 ml fyn kaneel
160 g fyn klapper
4 groot eiers
10 ml vanieljegeursel
’n knippie sout
250 g Mariekoekies, grofgekap
150 g Rice Krispies
100 g gesnipperde glanskersies of pekanneute (opsioneel)
Metode
Berei ’n 30 cm x 45 cm-bakplaat of ’n oondpan voor. Strooi ’n dik laag ekstrafyn klapper oor die boom. Smelt die botter en versiersuiker saam oor lae hitte; moenie dat die mengsel kook nie.
Voeg die dadels, kakao, kaneel en klapper by en kook vir 3-5 minute oor matige hitte. Klits die eiers, vanielje en sout saam en voeg dit by die gekookte mengsel. Voeg die koekies, Rice Krispies en die glanskersies of neute (indien gebruik) by en meng goed deur.
Druk die mengsel in die voorbereide pan, maak die bokant gelyk en laat dit by kamertemperatuur
afkoel. Sny in vingers of blokkies in die pan en sit dit in die yskas om hard te word. Sodra goed verkoel, breek in individuele vingers of blokkies en verpak tussen ekstra lae klapper in ’n lugdigte houer.
